Early Warning նախագիծը Թուրքիան ներառել է զանգվածային սպանությունների առումով բարձր ռիսկայնության երկրների տասնյակում
1 րոպեի ընթերցում
ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: ԱՄՆ Հոլոքոստի թանգարանի Early Warning նախագիծը Թուրքիան ներառել է երկրների տասնյակում, որտեղ բռնությունների և զանգվածային սպանությունների վտանգ կա:
Ինչպես հաղորդում է «Արմենպրես»-ը, Թուրքիան Early Warning նախագծի՝ 2018-2019թթ ընթացքում բռնությունների և զանգվածային սպանությունների բարձր ռիսկայնություն ունեցող երկրների ցանկում 8-րդն է:
Նշվում է, որ նախագծի վերջին երեք տարիների գնահատականներում Թուրքիան եղել է զանգվածային սպանությունների վտանգ պարունակող 15 երկրների ցանկում:
Նշվում է նաև, որ վարկանիշում Թուրքիայի դիրքը բարձրացել է այդ երկրում 2016թ. տեղի ունեցած հեղաշրջման ձախողված փորձից հետո: Երկրում զանգվածային սպանությունների ռիսկայնության գործոններն են նաև մարդկանց տեղաշարժի սահմանափակումները, ոչ ժողովրդավարական ռեժիմը, բնակչության մեծ քանակը, զանգվածային սպանությունների պատմությունը, քուրդ ապստամբների և Թուրքիայի իշխանությունների միջև շարունակվող զինված հակամարտությունը:
Early Warning նախագծի վարկանիշը գլխավորում է Կոնգոյի Դեմոկրատական Հանրապետությունը, երկրորդ հորիզոնականում Աֆղանստանն է, երրորդում՝ Եգիպտոսը: Եգիպտոսին հաջորդում են Հարավային Սուդանը, Պակիստանը, Եմենը, Անգոլան: