ԵՐԵՎԱՆ, 5 ԴԵԿՏԵՄԲԵՐԻ, ԱՐՄԵՆՊՐԵՍ: Սիրիայի Իդլիբ նահանգում ստեղծված իրավիճակի և դրա լուծման համար ճանապարհներ գտնելու նպատակով կրկին հանդիպելու են ՌԴ նախագահ Վլադիմիր Պուտինը, Թուրքիայի նախագահ Ռեջեփ Թայիփ Էրդողանը, Գերմանիայի կանցլեր Անգելա Մերկելը և Ֆրանսիայի նախագահ Էմանուել Մակրոնը:
Այս մասին, ինչպես հաղորդում է «Արմենպրես»-ը, գրում է «Ռիա Նովոստի»-ն:
ՌԴ նախագահի խոսնակ Դմիտրի Պեսկովը հայտնել է, որ պաշտոնական Մոսկվան իր համաձայնությունը տվել է սիրիական Իդլիբի հարցով 4 երկրի առաջնորդների մասնակցությամբ երկրորդ գագաթնաժողովին մասնակցելու կապակցությամբ:
Պեսկովի փոխանցմամբ՝ այս գագաթնաժողովը, ամենայն հավանականությամբ, նույնպես կանցկացվի Թուրքիայում, քանի որ դրա ձեռնարկողն ի սկզբանե եղել է Թուրքիայի նախագահը:
Տեղեկության համաձայն՝ գագաթնաժողովին մասնակցելու պատրաստակամություն է հայտնել նաև Գերմանիան:
Սիրիական հակամարտության և Իդլիբի նահանգում ստեղծված իրավիճակի հանգուցալուծման եղանակներ մշակելու նպատակով 4 երկրի առաջնորդների նախորդ հանդիպումը տեղի է ունեցել հոկտեմբերի 27-ին Ստամբուլում:
Նախորդ հանդիպման ժամանակ ղեկավարները շեշտել էին, որ սիրիական հակամարտությունն անհրաժեշտ է լուծել ՄԱԿ-ի հովանու ներքո ընթացող քաղաքական բանակցությունների միջոցով:
Հանդիպման ժամանակ որոշվել էր մինչև 2018 թ. վերջ ստեղծել կոմիտե, որը կզբաղվի Սիրիայի ապագա սահմանադրության մշակման գործով:
Գագաթնաժողովի մասնակիցների կարծիքով՝ նոր սահմանադրությունը հնարավորություն կտա Սիրիայում անցկացնել ազատ և արդար ընտրություններ: