«Ժամանակ» օրաթերթի գլխավոր խմբագրի հավաստմամբ` սփյուռքահայ մամուլը ազգապահպանման խնդիր է կատարում
2 րոպեի ընթերցում
ԵՐԵՎԱՆ, 23 ՆՈՅԵՄԲԵՐԻ, ԱՐՄԵՆՊՐԵՍ: Սփյուռքում լույս տեսնող հայկական մամուլը հայապահպանման խնդիր ունի, և սփյուռքի պայմաններում մարդիկ ազգապահպանության համար իրենց ընտանիք են մտցնում հայերեն օրաթերթը: «Արմենպրես»-ի փոխանցմամբ`«Մեդիայի դերը փոփոխվող աշխարհում» միջազգային լրատվական համաժողովի ընթացքում այսպիսի տեսակետ հայտնեց Ստամբուլի «Ժամանակ» օրաթերթի գլխավոր խմբագիր Արա Գոչունյանը:
«Ի տարբերություն Հայաստանի, սփյուռքի մեր մամուլի ուսերի վրա, բացի հաղորդակցությունն ապահովելու խնդրից, դրված է նաև ինքնության պահպանման խնդիրը: Այսօր մեր սփյուռքի պայմաններում մարդիկ ազգապահպանության համար իրենց ընտանիք են մտցնում հայերեն օրաթերթը»,- ասաց Գոչունյանը:
Նրա խոսքով` մամուլի ներուժը բարձրացնելու համար անհրաժեշտ է պատրաստված լրագրողների նոր սերունդ:
«Լրագրողական աշխատանքի կարևորությունը հետզհետե բարձրանում է: Մենք միշտ պետք է մեր օրակարգում ունենանք հայ մամուլի համար լրագրողների պատրաստության խնդիրը: Պետք է լծվենք լրագրողների երիտասարդ սերունդ պատրաստելու գործին: Մենք այնպիսի լրագրողներ պետք է պատրաստենք, որ Երևանում նստած կարողանան Լոս Անջելեսի կյանքը պատկերացնել, Փարիզում նստած կարողանան Պոլսի կյանքը պատկերացնել, Մոնրեալում նստած կարողանան Բեյրութի կյանքը պատկերացնել: Պետք է ունենանք այնպիսի մարդկային ռեսուրսներ, որոնք կբարձրացնեն մեր մամուլի ներուժը»,- նշեց խմբագիրը:
Երևանում նոյեմբերի 23-ին մեկնարկած «Մեդիայի դերը փոփոխվող աշխարհում» միջազգային լրատվական համաժողովի ընթացքում մեդիա ոլորտի մասնագետներն ու փորձագետները քննարկում են լրատվամիջոցների ապագային վերաբերող հարցերն ու լրատվական ինդուստրիայի զարգացման հեռանկարները:
Մեդիաֆորումը կազմակերպվել է«Արմենպրես»լրատվական գործակալության և ԱՊՀ երկրների ինստիտուտի հայաստանյան գրասենյակի համագործակցությամբ։