Արմեն Սարգսյանը Հայաստանում տեղի ունեցած խաղաղ հեղափոխությունը յուրօրինակ երևույթ է համարում ողջ աշխարհում
2 րոպեի ընթերցում
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ նախագահ Արմեն Սարգսյանի կարծիքով՝ Հայաստանում տեղի ունեցած ներքաղաքական իրադարձությունները և խաղաղ հեղափոխությունը բարձրացրել են Հայաստանի հեղինակությունը:
«Արմենպրես»-ի հաղորդմամբ՝ նախագահը նման կարծիք հայտնեց՝ պատասխանելով Մխիթար Սեբաստացի կրթահամալիրի փոքրիկ լրագրողների հարցին:
«Հայաստանի հեղինակությունը բարձրացել է: Հայաստանի նկատմամբ հետաքրքրությունը հսկայական է: Երկրում տեղի ունեցածը, հեղափոխական փոփոխությունը կատարվեց շատ հազվագյուտ ձևով ՝ առանց մարդկային զոհերի, առանց բռնության, ինչ-որ տեղ ժպիտով, պարով և զգացումներով: Սա շատ յուրօրինակ երևույթ է աշխարհով մեկ: Ե՛վ Երևանում, և՛ աշխարհով մեկ սփռված մեր հայրենակիցների մեծ մասը շատ ուրախ է և մեծ սպասելիքներ ունի»,-ասաց նախագահ Սարգսյանը:
Նրա կարծիքով՝ Հայաստանում տեղի ունեցածը համաշխարհային հանրության տեսակետից ևս շատ յուրօրինակ է: «Աշխարհը տեսել է հեղափոխություն Ուկրաինայում, Վրաստանում, Եգիպտոսում: Սակայն դրանք միանգամայն ուրիշ որակի են եղել»,-ասաց նախագահն ու հավելեց՝ սա մեկ անգամ ևս ցույց է տալիս, որ մեր ժողովուրդն առանձնահատուկ է:
Արմեն Սարգսյանի կարծիքով՝ կա մեծ ուրախություն, բայց և կան սպասելիքներ, որոնք չի կարելի չարդարացնել: Երկրի նկատմամբ վերաբերմունքի ձևավորումը տարիների աշխատանքի արդյունք է: