Արծրուն Հովհաննիսյանը հրապարակել է տեսանյութ Գյուննոտի հատվածում հայկական զինված ուժերի լիարժեք վերահսկողության մասին
1 րոպեի ընթերցում
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: ՀՀ պաշտպանության նախարարության մամուլի խոսնակ Արծրուն Հովհաննիսյանն իր ֆեյսբուքյան էջում հրապարակել է տեսանյութ, որը վկայում է Գյուննոտի հատվածում հայկական զինված ուժերի լիարժեք վերահսկողության մասին:
«Արմենպրես»-ի հաղորդմամբ, տեսանյութը հրապարակվել է հետևյալ գրառմամբ. «Նկարահանված է հայկական դիրքերից, այն դիրքից, որը լիարժեք վերահսկողություն ունի գյուղի ավերակների նկատմամբ»:
Արծրուն Հովհաննիսյանը օրեր առաջ տեղեկացրել էր, որ սույն թվականի հունիսի 6-ին և 7- ին ադրբեջանական կողմը դիմել է ՀՀ ԶՈւ երի հրամանատարությանը, խնդրելով թույլատրել որոշ քաղաքացիներին՝ մոտենալ Գյուննոտ ավերակ բնակավայրի հարավային արվարձանի գերեզմանատեղիներին։
«Նման խնդրանք այդ հատվածում ադրբեջանական կողմը հայտնել է առաջին անգամ։ Հայկական կողմը, հավատարիմ լինելով մարդասիրական նորմերին և մշտապես կատարելով լարվածության թուլացման քայլեր, համաձայնել է թույլատրել խաղաղ բնակիչների՝ կարճ ժամանակով մոտենալ գերեզմանատեղիին»,-նշել է Արծրուն Հովհաննիսյանը:
Ադրբեջանական կողմը շահարկեց հայկական կողմի բարի կամքի դրսևորումը՝ ներկայացնել այն իբր իրենց համար ձեռքբերում և այդ տարածքների նկատմամբ հսկողություն: