Նիկոլ Փաշինյանն Արմեն Սարգսյանի հետ հանդիպմանը կրկնել է հնարավոր երկխոսության նախապայմանները
2 րոպեի ընթերցում
ԵՐԵՎԱՆ, 21 ԱՊՐԻԼԻ, ԱՐՄԵՆՊՐԵՍ: Ազգային ժողովի պատգամավոր Նիկոլ Փաշինյանը ՀՀ նախագահ Արմեն Սարգսյանի հետ Հանրապետության հրապարակում ունեցած հանդիպման ընթացքում կրկնել է իշխանությունների հետ երկխոսության գնալու նախապայմանները: Ինչպես փոխանցում է «Արմենպրես»-ը, տեղի ունեցած հանրահավաքի ընթացքում Փաշինյանը ներկայացրեց Արմեն Սարգսյանի հետ հանդիպման մանրամասները:
« Պարոն Սարգսյանն ասաց՝ հիմա ի՞նչ, Դուք ասում եք, որ ընդհանրապես խոսելու, քննարկելու, բանակցելու կարիք չկա՞: Ես պատասխանեցի, որ երեկվա հանրահավաքում արտահայտել եմ իմ դիրքորոշումը, որ մենք պատրաստ ենք քննարկել իշխանության հեռացման և իշխանության խաղաղ ու անցնցում փոխանցման պայմանները»,- նշեց Փաշինյանը՝ ավելացնելով, որ պատրաստ են բանակցել միայն իրենց առաջադրած օրակարգի շուրջ:
Ըստ ընդդիմադիր պատգամավորի՝ Արմեն Սարգսյանը հետաքրքրվել է, թե ինչ ֆորմատով է ինքը պատկերացնում բանակցությունները և որտեղ: «Բնականաբար, նման բանակցությունը չի կարող տեղի ունենալ նաև կառավարական որևէ շենքում, որովհետև ինքս այդպիսի տեղեր չեմ գնա, որևէ թեմայով: Բանակցությունը հնարավոր է որևէ երրորդ, չեզոք վայրում, օրինակ՝ «Մարիոթ Արմենիա» հյուրանոցում կամ այլ հյուրանոցում»,- ներկայացրել է Նիկոլ Փաշինյանը՝ կրկնելով, իր նախապայմանները:
«Սա է մեր պատկերացրած ճանապարհային քարտեզը, սակայն մեր մեխանիզմների միակ տարբերակը չէ, մենք ունենք պլան՝ Բ, պլան՝ Գ»,- ասաց Փաշինյանը:
Միաժամանակ, նա ասաց, որ Արմեն Սարգսյանի հետ հանդիպմանը երաշխավորել է, որ իրենց շարժման որևէ մասնակից որևէ բռնություն չի գործադրելու և իրենք նման որևէ ծրագիր չունեն, վարում են բաց ձեռքերի քաղաքականություն:
Նիկոլ Փաշինյանն անդրադարձավ նաև քաղաքական ակցիաների ընթացքում իր կողմնակիցների ավտոմեքենաների վնասման դեպքերին ու վստահեցրեց, որ շարժումը կամ բյուջեն կհոգան այդ ծախսերը: