Էմանուել Մակրոն, Գարո Փայլան. Ֆրանսիայի հայկական կազմակերպությունների ամենամյա ընթրիքը կլինի ներկայացուցչական
2 րոպեի ընթերցում
ԵՐԵՎԱՆ, 30 ՀՈՒՆՎԱՐԻ, ԱՐՄԵՆՊՐԵՍ: Ֆրանսիայի հայկական կազմակերպությունների համակարգող խորհրդի ամենամյա ընթրիքին ակնկալվում է Ֆրանսիայի նախագահ Էմանուել Մակրոնի ելույթը: Ինչպես «Արմենպրես»-ի հետ զրույցում նշեց Ֆրանսիայի Հայ Դատի հանձնախմբի ատենապետ Հարութ Մարտիրոսյանը, սպասում են Ֆրանսիայի նախագահի դիրքորոշման հստակեցում:
«Շատ կարևոր ձեռբերում է, որ հերթական անգամ Ֆրանսիայի հայկական կազմակերպությունների համակարգող խորհրդի ամենամյա ընթրիքին ապահովվում է մասնակցություն Ֆրանսիայի նախագահի մակարդակով: Միջոցառմանը մենք ներկայացնելու ենք հայկական հարցերը, սպասում ենք Ֆրանսիայի նախագահի հստակեցումները հայկական հարցերի հետ կապված: Մինչև հիմա դրական ազդակներ են եկել, նշվել է, որ Ֆրանսիայի նախագահը սիրով է վերաբերում հայ ժողովրդին, հայերին, սակայն մենք դեռ շատ տեղեկություններ չունենք հայկական հարցերի վերաբերյալ նրա դիրքորոշման մասին: Ուզում ենք հասկանալ, թե ինչ ճանապարհով ենք առաջ շարժվելու»,-ասաց Հարութ Մարտիրոսյանը:
Ամենամյա ընթրիքը տեղի է ունենալու հունվարի 30-ին:
Ավանդական դարձած ընթրիքին կմասնակցեն Ֆրանսիայի նախագահը, Թուրքիայի մեջլիսի պատգամավոր Գարո Փայլանը, Փարիզի քաղաքապետ Անն Իդալգոն, Լիոնի քաղաքապետ Գևորգ (Ժորժ) Կեպենեկյանը, կառավարության անդամներ, խորհրդարանականներ, ֆրանսահայ կազմակերպությունների ղեկավարներ, հոգևոր հայրեր և այլք:
«Առաջ» շարժման առաջնորդ Էմանուել Մակրոնը Ֆրանսիայի նախագահ է ընտրվել մայիսին կայացած ընտրություններիարդյունքում: