«Ակոս»-ի խմբագիրը Թուրքիայում տիրող ազգայնական մթնոլորտի պայմաններում հասկանալի է համարում պատրիարքարանի հայտարարությունը

3 րոպեի ընթերցում

ԵՐԵՎԱՆ, 25 ՀՈՒՆՎԱՐԻ, ԱՐՄԵՆՊՐԵՍ: Ստամբուլի հայկական «Ակոս» պարբերականի գլխավոր խմբագիր Եդվարդ Դանզիկյանը վստահ է՝ Թուրքիայում տիրող ազգայնականության թեժ մթնոլորտի պայմաններում հասկանալի է Պոլսո Հայոց պատրիարքարանի կողմից արված հայտարարությունը թուրքական զինուժի կողմից Սիրիայում սկսված ռազմական գործողությանն աջակցելու վերաբերյալ:

«Արմենպրես»-ի խնդրանքով նա անդրադարձավ փաստին, որ Թուրքիայի հայկական համայնքի մի շարք անդամներ խիստ բացասաբար էին արձագանքել պատրիարքարանի կողմից հնչեցված հայտարարությանը: «Թուրքիայում այս պահին ուժեղ ազգայնական քամիներ կան, և նման պայմաններում եթե որևէ ազգային փոքրամասնության կառույց պետությանն աջակցող հայտարարություն է հանում, մյուսներն էլ դա անելու պարտավորվածություն են զգում»,- նշեց Դանզիկյանը:

Նա հիշեցրեց, որ նմանօրինակ հայտարարությունների իրենք շատ են ականատես եղել 1980-90-ական թվականներին՝ Թուրքիայում ռազմական հեղաշրջման փորձին հաջորդած բռնությունների ժամանակաշրջանում: «Այս առումով թվում է, թե Թուրքիայում ոչինչ չի փոխվել: Իհարկե, նման հայտարարությունները չեն կարող բոլորի կողմից աջակցություն ստանալ, սակայն մյուս կողմից էլ պետք է չմոռանալ, որ Թուրքիայում ձերբակալվում են անգամ այն անձինք, ովքեր սոցիալական մեդիայի միջոցով հայտարարում են, թե չեն ցանկանում պատերազմ»,- ասաց «Ակոս»-ի գլխավոր խմբագիրը՝ նկատի ունենալով այն փաստը, որ Սիրիայում թուրքական զինուժի կողմից իրականացվող «Ձիթենու ճյուղ» գործողությանը դեմ արտահայտված տասնյակ անձինք ներկայում ձերբակալված կամ կալանավորված են:

«Հետևաբար, որքանով որ սխալ է ասելը, թե «հայերը աջակցում են պատրիարքարանի հայտարարությանը», նույնքանով էլ սխալ է ընդհանրացում անելը, թե «հայերը դրան չեն աջակցում»: Նման պայմաններում պատրիարքարանը սովորաբար պետության կողքին է եղել: Սակայն անհերքելի է նաև այն, որ շատերը սխալ են համարում այս թեմայով պատրիարքարանի կողմից հայտարարության հնչեցումը»,- նշեց Դանզիկյանը:

Թուրքիայի զինված ուժերը հունվարի 20-ից Սիրիայի Աֆրին շրջանում քրդերի (PYD) դեմ ռազմական գործողություն են սկսել, որը ստացել է «Ձիթենու ճյուղ» անվանումը:

Գործողությունների մեկնարկից հետո հայտարարություն էր տարածել Պոլսո Հայոց պատրիարքարանը՝ աջակցություն հայտնելով գործողությանն ու նշելով, թե կաղոթեն «խաղաղության և հանգստության համար, որի կարիքն այդքան ունի մարդկությունը»:

Պատրիարքարանի հայտարարությունը մեծապես ողջունվել էր պաշտոնական Անկարայի կողմից: Թուրքիայի նախագահի խոսնակ Իբրահիմ Քալընը թվիթերյան իր էջում գրառում էր կատարել՝ շնորհակալություն հայտնելով ինչպես Պոլսո Հայոց պատրիարքարանին, այնպես էլ նմանօրինակ հայտարարություններով հանդես եկած Թուրքիայի հրեական համայնքին ու Համայնքային հիմնադրամներին:

Հայերեն English

Վահան Կոստանյանը հանդիպել է Պաղեստինի արտաքին գործերի և սփյուռքի նախարարի հետ

Լևոն Աբրահամյանը՝ Հայաստանի նկարիչների միության նոր նախագահ

Իրանի դեմ վերջերս տեղի ունեցած երկու պատերազմների ընթացքում զոհվել է առնվազն 428 երեխա և դեռահաս

Վարչապետը հանդիպում է ունեցել է Խաղաղության Նոբելյան մրցանակակիր Քայլաշ Սաթյարթիի հետ

ԻՀՊԿ-ն հայտնել է Հորմուզի նեղուցի մոտակայքում 58-րդ ամերիկյան MQ-9 ԱԹՍ-ը խոցելու մասին

Հայաստանում կստեղծվի կիբեռանվտանգության կամպուս. ծրագիրը կիրականացվի Ֆրանսիայի և ԵՄ-ի աջակցությամբ

Կայացավ ՀՆՄ 21-րդ համագումարը

Հրդեհ Եղվարդ քաղաքում. հրշեջ-փրկարարները կանխել են հրդեհի տարածումը դեպի հարակից բնակելի տուն

Հունաստանի ամենահեղինակավոր Ակրոպոլիսի թանգարանում բացվել է հին Հայաստանին նվիրված բացառիկ ցուցահանդես

«Վայլդբերրիզ» ՍՊԸ-ի գլխավոր տնօրենի փոփոխությունը չի ազդում ընկերության գործառնական գործունեության վրա