2 րոպեի ընթերցում
ԵՐԵՎԱՆ, 22 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի ֆուտբոլի ազգային հավաքականի և անգլիական «Մանչեսթեր Յունայթեդ»-ի կիսապաշտպան Հենրիխ Մխիթարյանը կարող է տեղափոխվել Լոնդոնի «Արսենալ»: Ինչպես հաղորդում է «Արմենպրես»-ը, այս մասին գրում է բրիտանական Express պարբերականը:
Նշվում է, որ «Արսենալ» հետաքրքրված է Մխիթարյանի ծառայություններով, քանի որ թիմի ղեկավարությունը համակերպվել է այն մտքի հետ, որ գերմանացի կիսապաշտպան Մեսութ Օզիլը լքելու է թիմը: «Արսենալ»-ում Օզիլին փոխարինող են փնտրում, իսկ Մխիթարյանը համարվում է Օզիլին փոխարինողի ամենահավանական տարբերակը:
Հաղորդվում է, որ տրանսֆերը կարող է արժենալ 30 միլիոն եվրո:
Հայաստանի ազգային հավաքականի կիսապաշտպանը մասնակցել է «Մանչեսթեր Յունայթեդ»-ի վերջին 8 խաղերից միայն երկուսին` խաղադաշտ դուրս գալով հանդիպման վերջին 20 րոպեներին: Մնացած խաղերում Մխիթարյանը չի ընդգրկվել նույնիսկ «Մանչեսթեր Յունայթեդ»-ի հայտացուցակում: Իտալական և բրիտանական մամուլը հեղեղված են Մխիթարյանի տրանսֆերի մասին տարաբնույթ լուրերով: Իտալական մամուլի համաձայն` Մխիթարյանի ծառայություններով հետաքրքրված են Միլանի «Ինտեր»-ն ու Թուրինի «Յուվենթուս»-ը, իսկ բրիտանական մամուլում առավել հաճախակի են հրապարակումներն այն մասին, որ Մխիթարյանը կարող է վերադառնալ իր նախկին ակումբ` Դորտմունդի «Բորուսիա»: