Պարտադիր բժշկական ապահովագրությունը Հայաստանում լավագույն դեպքում կներդրվի 2019-ի վերջից
2 րոպեի ընթերցում
ԵՐԵՎԱՆ, 29 ՆՈՅԵՄԲԵՐԻ, ԱՐՄԵՆՊՐԵՍ: Բնակչության պարտադիր բժշկական ապահովագրությունը Հայաստանում լավագույն դեպքում կներդրվի 2019 թվականի վերջից: Ապահովագրավճար կսահմանվի կամ բացարձակ թիվ, կամ աշխատավարձի առավելագույնը 2 տոկոսը: «Արմենպրես»-ի հաղորդմամբ՝ լրագրողների հետ զրույցում այս մասին ասաց ՀՀ առողջապահության նախարար Լևոն Ալթունյանը:
«2018 թվականի 612 000 սոցիալապես անապահով անձանց ապահովագրության ծրագրի անթերի աշխատանքից հետո միայն կներդրվի բնակչության պարտադիր բժշկական ապահովագրությունը: Պարտադիր բժշական ապահովագրության համար կա երկու բանաձև, երբ ողջ ապահովագրավճարը՝ ամսական 6000 դրամը վճարում է քաղաքացին, կամ, երբ 50 տոկոսը վճարում է քաղաքացին, 50 տոկոսը՝ գործատուն»,-ասաց նախարարն ու հավելեց՝ փորձը ցույց է տվել, որ քաղաքացին պետք է վճարի, քանի որ այդ դեպքում իր առողջության նկատմամբ պատասխանատվությունը մեծանում է:
Ալթունյանի կարծիքով՝ նախանշված ամսական գանձվող 6000 դրամն աննախադեպ ցածր գումար է ողջ աշխարհի համար, այդ թվում՝ հետսովետական երկրների: Չեխիայում, որտեղ առողջապահությունը կաճ ժամկետում մեծ հաջողությունների է հասել, ապահովագրավճարը կազմում է աշխատավարձի մոտ 15 տոկոսը: Հայաստանում աշխատավարձերն ավելի ցածր են, հետևաբար շատ ավելի ցածր կլինի ապահովագրավճարը:
«Մենք մոդելավորել ենք բոլոր իրավիճակները: Նույնիսկ բժշկի չդիմելու դեպքում ամսական ապահովագրավճարի մոտ 3000 դրամը վերադառնալու է ընտանիքին սքրինինգային հետազոտությունների շնորհիվ: Մենք գանձում ենք այդ գումարը, որպեսզի ծախսենք մարդկանց առողջության վրա, երկարացնենք առողջ կյանքի տևողությունը»,-եզրափակեց նախարարը: