Ռուբեն Սաֆրաստյանը կարեւոր է համարում Սիրիայի ազգային երկխոսության կոնգրեսի անցկացումը խաղաղ կարգավորման գործընթացի համատեքստում

ԵՐԵՎԱՆ, 23 ՆՈՅԵՄԲԵՐԻ, ԱՐՄԵՆՊՐԵՍ: Արևելագիտության ինստիտուտի տնօրեն, թուրքագետ Ռուբեն Սաֆրաստյանը կարծում է, որ պետք է սպասել Սիրիայի ազգային երկխոսության կոնգրեսին, քանի որ դրա անցկացումը, ըստ թուրքագետի, կարեւոր քայլ է:

«Նախապատրաստվում է կոնգրես, որին պետք է մասնակցեն բոլոր այն ուժերը, որոնք շահագրգռված են, որ Սիրիան պահպանվի՝ որպես ամբողջական պետություն։ Եթե հաջողվի այս կոնգրեսն իրականացնել, իսկ դա նախատեսված է դեկտեմբերին, ապա դրանից հետո խաղաղ կարգավորման գործընթացը շատ արագ առաջ կընթանա»,-«Արմենպրես»-ի հաղորդմամբ՝ ասաց թուրքագետը:

Նրա խոսքով՝ Սիրիայում այժմ սկսվել է հետպատերազմյան փուլ։ Թուրքագետը նշեց, որ չնայած դեռեւս վաղ է կանխատեսումներ անել այդ խաղաղ կարգավորման գործընթացի՝ հաջողությամբ ավարտվելու վերաբերյալ, սակայն ամեն դեպքում հույսեր կան:

«Թուրքիան, Ռուսաստանն ու Իրանը կարողանում են հաջողությամբ իրենց ջանքերը համատեղել Սիրիայում, ինչի շնորհիվ, Սիրիայի տարածքը գրեթե ազատագրվել է «Իսլամական պետությունից»։ Խաղաղ գործընթացը պետք է տեղի ունենա ոչ թե այս 3 երկրների ձևաչափով, այլ ՄԱԿ-ի անմիջական ղեկավարության ներքո»,-ասաց Ռուբեն Սաֆրաստյանը:

Դրական գործոններին զուգահեռ նա խոսեց նաեւ բացասական գործոններից, որոնք, ըստ թուրքագետի, հնարավոր չէ շրջանցել։ Նրա դիտարկմամբ՝ սիրիական կոնֆլիկտում ներգրավված տարբեր ուժեր ունեն իրենց շահերը:

«Թուրքիան, ներգրավվելով սիրիական հակամարտությանը, իր առջեւ երկու խնդիր էր դրել՝ տապալել Ասադի կառավարությունը եւ թույլ չտալ քրդական ուժերին՝ ակտիվանալ Սիրիայում։ Աստանայի գործընթացի ժամանակ Թուրքիան ցույց տվեց, որ Ասադի տապալման խնդիրը հետաձգել է։ Հիմա Թուրքիան կենտրոնանում է քրդական խնդրի վրա եւ պահանջում, որ քրդական տարածքները կառավարող քաղաքական ուժը, որն ըստ նրանց՝ կապված է PKK-ի հետ, չմասնակցի ազգային ուժերի երկխոսության կոնգրեսին։ Սա, իհարկե, լուրջ պահանջ է, եւ եթե Թուրքիան չհամաձայնի այս ձևաչափին, ապա կնշանակի, որ նրա տիրապետության տակ գտնվող ընդդիմադիր ուժերը նույնպես չեն մասնակցի այդ կոնգրեսին»,-նշեց Ռուբեն Սաֆրաստյանը՝ հավելելով, որ սիրիական այս բարդ գործընթացն ունի համամոլորակային նշանակություն, քանի որ դրանում ներգրավված են բազմաթիվ ուժեր: Նա անհիմն համարեց այս եւ Արցախի գործընթացի միջեւ անցկացվող համեմատությունները:

«Ռուսաստանը, լինելով միջնորդ, ԵԱՀԿ Մինսկի խմբի համանախագահներից մեկը, ուղղակի ապահովում է հարթակ բանակցային գործընթացի համար։ Երկրորդ՝ Ռուսաստանի շահերից ընդհանրապես չի բխում, որ նա որեւէ զիջումների գնա Արցախի հիմնահարցի կարգավորման գործընթացում։ Ռուսաստանը որեւէ քայլի չի գնա, որը կվնասի Հայաստանի շահերն ու կասկածի տակ կդնի հայ-ռուսական հարաբերությունները»,-ընդգծեց թուրքագետը։