1 րոպեի ընթերցում
ԳԱՎԱՌ, 23 ՆՈՅԵՄԲԵՐԻ, ԱՐՄԵՆՊՐԵՍ: Գեղարքունիքի մարզում նոյեմբերի 22-ին տեղացած ձյան եւ բացասական ջերմաստիճանի պայմաններում մերկասառույց է ձեւավորվել մարզի միջպետական, հանրապետական ու մարզային նշանակության որոշ ճանապարհներին:
Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի քաղաքաշինության վարչության տրանսպորտի եւ ճանապարհաշինության բաժնի վարիչ Գեւորգ Խաչատրյանը, ձյան տեղումներ հիմնականում գրանցվել են Սեւանի եւ Ճամբարակի տարածքներում եւ Վարդենյաց լեռնանցքում, մոտ 5-10 սանտիմետր շերտով: «Ճանապարհները հիմնականում մաքրված են ձյունից, սակայն մերկասառույց առկա է Սեւանում, Ճամբարակի եւ Վարդենյաց լեռնանցքներում, որտեղ իրականացվել են մշակման աշխատանքներ:
Հետկեսօրին արեւեոտ եղանակի ազդեցությամբ ճանապարհները, հավանաբար, կարող են ազատվել մերկասառույցից: Ամեն դեպքում, առայժմ մարզում փակ կամ դժվարանցանելի ճանապարհներ չկան»,-նշեց Գեւորգ Խաչատրյանը: ՀՀ ԱԻՆ Գեղարքունիքի մարզի Ճգնաժամային կառավարման կենտրոնի տվյալներով՝ երեկ եւ այսօր կենտրոնը ստացել է մի քանի ահազանգ, որոնք վերաբերել են մերկասառույցի պատճառով ավտոմեքենաների արգելափակվելուն կամ ճանապարհի երթեւեկելի մասերից դուրս գալուն: