Ռուսական ռազմակայանի դիպուկահարները «մենամարտեր» են անցկացրել անօրինական կազմավորումների հետ
2 րոպեի ընթերցում
ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի ռուսական ռազմակայանի դիպուկահարների ստորաբաժանման զինծառայողները 2017 թվականի ամառային ուսուցման շրջանի ամփոփիչ ստուգարքի շրջանակներում «մենամարտեր» են անցկացրել Հայաստանի լեռներում:
Ինչպես «Արմենպրես»-ին տեղեկացրել են ՌԴ Հարավային ռազմական օկրուգի մամուլի ծառայությունում, դիպուկահար զինծառայողների ամփոփիչ ուսումնամարտական մրցումներն անցկացվել են «Ալագյազ» զորափորձարանում՝ ծովի մակարդակից ավելի քան 2 հազար մետր բարձրության վրա, կլիմայական բարդ պայմաններում, անծանոթ տեղանքում:
Ամփոփիչ ստուգարքի հանձնմանը նախապատրաստվելիս զորամիավորման դիպուկահարները գործնականում կատարել են հատուկ մարտավարական եւ կրակային պատրաստության նորմատիվները: Զինծառայողներն օպտիկական սարքերի օգտագործմամբ մինչեւ 1500 մետր հեռավորությունից հետեւել են պայմանական հակառակորդի առավել կարեւոր թիրախներին:
«Մենամարտերի» ընթացքում երկու խմբի բաժանված դիպուկահարները կատարել են պայմանական հակառակորդի անօրինական զինված կազմավորումների դիվերսիոն խմբերի կրակային խոցման, ճնշման ու ոչնչացման նորմատիվները: Նաեւ դիպուկահարները կատարել են բարձրլեռնային ժայռոտ լանդշաֆտի պայմաններում քողարկման եւ հայտնաբերված առավել կարեւոր թիրախների վրա նշանառու կրակի առաջադրանքներ:
Ընդամենն ամփոփիչ ստուգմանը ներգրավվել Էին ռուսական զորամիավորման հարյուրից ավելի դիպուկահարներ: