1 րոպեի ընթերցում
ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ: Թուրքիայի արտաքին գործերի նախարարությունը սեպտեմբերի 25-ին հատուկ հայտարարությամբ է հանդես եկել՝ հայտնելով, որ առ ոչինչ է համարում Հյուսիսային Իրաքի քրդական ինքնավարությունում հանրաքվեի արդյունքները:
Ինչպես հաղորդում է «Արմենպրես»-ը, ԱԳՆ հայտարարության մեջ նշվում է, որ նախաձեռնությունը զուրկ է իրավական հիմքերից և օրինականությունից:
Պաշտոնական Անկարան մեղադրել է Իրաքյան Քրդստանի ղեկավարությանը զգոնություն չցուցաբերելու և տարածաշրջանի խաղաղությանն ու կայունությանը սպառնալու մեջ:
ԱԳՆ-ից հայտնել են, որ հանրաքվեի անցկացումը ծանր հետևանքներ է ունենալու Հյուսիսային Իրաքի քրդական ինքնավարության համար:
Թուրքիան հայտարարել է, որ ծայրահեղական տարրերի և ահաբեկիչների կողմից իրենց ազգային անվտանգությանը ցանկացած սպառնալիքի պարագայում կձեռնարկեն բոլոր անհրաժեշտ միջոցառումները: