ԻՊ-ն վերահսկում է Դեր Զորի նավթային հանքավայրերի 80 տոկոսից ավելին
1 րոպեի ընթերցում
![ԻՊ-ն վերահսկում է Դեր Զորի նավթային հանքավայրերի 80 տոկոսից ավելին](http://armenpress.am/resized/480/static/news/b/2017/09/906326.jpg)
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Դեր Զորի նահանգի նավթային և գազային հանքավայրերի մեծ մասը մնում է «Իսլամական պետություն» ահաբեկչական խմբավորման վերահսկողության ներքո: Ինչպես հաղորդում Է«Արմենպրես»-ը, այս մասին հայտնում է«ՌԻԱ Նովոստի»-ն:
«Ներկայումս Դեր Զորի նավթային պաշարների 80%-ից ավելին ԻՊ-ի վերահսկողության տակ է: Գազի հանքավայրերը գործնականում դեռևս ահաբեկիչների վերահսկողության տակ են: Գազի բոլոր գործարանները և հանքավայրերը, որոնց մասին մենք խոսում ենք, գտնվում են Եփրատի այն կողմում. դրանք են՝ Կոնոկոն, Օմարը, Ջաֆրան, Էզբան և Թանաքը, և այնտեղ են գտնվում գազամշակող գործարանների մեծ մասը ևս»,- հայտնել է Դեր Զորում սիրիական գազային ընկերության գլխավոր ներկայացուցիչ Ամին Ալ-Համիդը:
Նրա խոսքով՝ նահանգում միակ հանքավայրը Աթ-Թայեմն է, որը վերահսկում են կառավարական ուժերը և նրանց դաշնակիցները:
ԻՊ-ն Դեր Զորի նավթային և գազային դաշտերը զավթել է 2014 թվականի ապրիլին: