1 րոպեի ընթերցում
ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ: Զբոսաշրջության զարգացման հարցում մեծ նշանակություն ունի երկրի ճանաչելիության բարձրացումը, և այս առումով սփյուռքի դերը կարևոր է: «Արմենպրես»-ի հաղորդմամբ՝ սեպտեմբերի 18-ին լրագրողների հետ ճեպազրույցում այս մասին ասաց Զբոսաշրջության կոմիտեի նախագահ Զարմինե Զեյթունցյանը:
«Ոչ պաշտոնական տվյալներով՝ սփյուռքի միայն 10 տոկոսն է այցելել Հայաստան: Զբոսաշրջության կոմիտեի համար թիրախային շուկա է համարվում սփյուռքը, ուստի կոմիտեն այնտեղ գտնվող բոլոր կազմակերպությունների հետ ակտիվ համագործակցում է, որպեսզի բարձրացվի երկրի ճանաչելիության մակարդակը»,- ասաց Զեյթունցյանը:
Զբոսաշրջության կոմիտեի նախագահը նշեց, որ սփյուռքում Հայաստանի վերաբերյալ տեղեկատվություն բավականին քաղաքականացված է:
«Պետք է հայաստանյան մամուլի և այլ հարթակների միջոցով մեր երկրի մասին պատրաստել հետաքրքրիր և բովանդակային տեղեկություն, քանի որ այսօր սփյուռքահայը ավելի շատ կարդում է տեղական մամուլը»,-նշեց Զեյթունցյանը: