Մարմնամարզիկները լավ մասնակցություն ունեցան Ունիվերսիադային. Հակոբ Սերոբյան
2 րոպեի ընթերցում
![Մարմնամարզիկները լավ մասնակցություն ունեցան Ունիվերսիադային. Հակոբ Սերոբյան](http://armenpress.am/resized/480/static/news/b/2017/08/903397.jpg)
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Հայաստանի մարմնամարզության հավաքականի գլխավոր մարզիչ Հակոբ Սերոբյանի կարծիքով, մարմնամարզիկներն արդարացրել են իրենց Ուսանողական խաղերում:
«Մենք նախապատրաստական փուլն անցկացրեցինք Երևանում: Մեդալի սպասելիքով էինք մեկնել Ունիվերսիադա: Երկու մարզիկից էլ սպասում էինք: Արթուր Թովմասյանի համար մեծ հաջողություն էր Ունիվերսիադայի կրկնակի չեմպիոն դառնալը: Բազմամարտում հանդես եկող Արթուր Դավթյանից էլ գոհ եմ, քանի որ շատ լավ մասնակցություն ունեցավ: Իր առաջ դրված խնդիրը 5 անգամ ավելի բարդ էր»,-«Արմենպրես»-ի հաղորդմամբ` լրագրողների հետ հանդիպման ժամանակ ասաց Սերոբյանը:
Հավաքականի գլխավոր մարզիչը խոսեց նաև Ա. Ազարյանի անվան մարզադպրոցի մարզադահլիճից, որը մնում է անմխիթար վիճակում: «Ազատ վարժության համար դահլիճում հարկավոր է 14x14 մ ուղիղ բետոնե ծածկույթ անել: Եթե չանենք, ապա աններելի կլինի զատ վարժության նոր գործիքը տեղադրել ջարդված հատակին: Դեռևս հույս ունենք, որ դահլիճը ինչ-որ կերպ կվերանորոգվի»,-նշեց մարզիչը:
Հավաքական թիմն արդեն սկսել է նախապատրաստվել աշխարհի առաջնությանը, որը կկայանա հոկտեմբերին Կանադայում: Մինչ այդ թիմը Սերոբյանի գլխավորությամբ կմասնակցի նաև Փարիզում կայանալիք Աշխարհի գավաթի խաղարկությանը: Ինչպես նաև ուսումնամարզական հավաք կանցկացնեն Ֆրանսիայի, Ճապոնիայի թիմերի հետ: