368.54
Արմեն Ամիրյանը բավարար չի գնահատել Հայաստանի պետական երիտասարդական նվագախմբի հաշվետվությունը
2 րոպեի ընթերցում
ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: ՀՀ մշակույթի նախարար Արմեն Ամիրյանը բավարար չի գնահատել Հայաստանի պետական երիտասարդական նվագախմբի տնօրեն Սարգիս Բալբանյանի ներկայացրած կիսամյակային հաշվետվությունը, դրանում ամրագրված ֆինանսական ցուցանիշներն ու ՊՈԱԿ-ի վարած «հրավիրատոմսային քաղաքականությունը»:
Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, Երիտասարդական նվագախմբի ներկայացրած հաշվետվությանը ծանոթանալուց հետո Արմեն Ամիրյանը հանձնարարել է ներկայանալ առողջացման ծրագրով:
«Որքան շատ տոմս վաճառեք, այնքան շատ մարդու հաղորդակից կդարձնեք ձեր արվեստին: Սակայն լավագույն հանդիսատեսը նա է, որը տոմս է գնել ու եկել համերգին, իսկ անվճար հրավիրատոմսը փոխում է մարդու հոգեբանությունը: Հանդիսատեսը մտածում է՝ միևնույն է, հրավիրատոմսը անվճար բաժանելու են, դուք էլ ձեր հերթին եք մտածում՝ պետությունը վճարելու է»,-ասել է նախարարն ու հորդորել, որ փոխեն այդ մտայնությունը:
Արմեն Ամիրյանը նկատել է, որ նրանք կառավարման մեխանիզմներին շատ լավ տիրապետում են, սակայն ցուցանիշները չեն համապատասխանում իրենց ստեղծագործական ու կառավարչական որակին: Նախարարը հանձնարարել է կարգավորել տոմսային տնտեսությունը, գտնել հավելյալ եկամուտներ վաստակելու ուղիներ, կազմակերպել հետաքրքիր, ինքնատիպ լուծումներով համերգներ, աշխատել հուշանվերային փաթեթների ուղղությամբ:
«Ուզում եմ տեսնել ջանք, աշխատանք, նոր, հետաքրքիր մտքեր: Մտածեք ու մշակեք ծրագրեր, որպեսզի հաջորդ կիսամյակը լինի ավելի առողջ»,-եզրափակել է նախարարը:
Բաժանորդագրվեք մեր ալիքին Telegram-ում