ՀՀ նախագահ Ռոբերտ Քոչարյանը հանդիպում է ունեցել ԵԱՀԿ անդամերկրների դիվանագիտական ներկայացուցչությունների ղեկավարների հետ
2 րոպեի ընթերցում
ԵՐՎԱՆ, 3 ՄԱՅԻՍԻ, ԱՐՄԵՆՊՐԵՍ: ՀՀ նախագահ Ռոբերտ Քոչարյանն այսօր հանդիպում է ունեցել Հայաստանում հավատարմագրված Եվրոպայի անվտանգության եւ համագործակցության կազմակերպության (ԵԱՀԿ) անդամ երկրների դիվանագիտական ներկայացուցչությունների ղեկավարների հետ: Ինչպես «Արմենպրեսե-ին հայտնեցին ՀՀ նախագահի մամլո գրասենյակից, զրույցի հիմնական թեման եղել են առաջիկա խորհրդարանական ընտրություններն ու ընտրական գործընթացի հետ կապված հարցերը: Հանրապետության նախագահի խոսքով, Հայաստանի կյանքում բավականին պատասխանատու ժամանակահատված է. ընտրական գործընթացը թեւակոխել է եզրափակիչ փուլ: Երկրի ղեկավարը եւս մեկ անգամ ընդգծել է կառավարության վճռականությունը միջազգային չափանիշներին համապատասխան ընտրություններ անցկացնելու գործում: Նշելով, որ նախընտրական շրջանը բավականին հանգիստ եւ քաղաքակիրթ ընթացք ունի, Ռոբերտ Քոչարյանն այստեղ կարեւորել է իշխանությունների եւ մասնակից հիմնական քաղաքական ուժերի դերը: Նախագահը ցանկություն է հայտնել լսել դիվանագետների տեսակետներն ու նկատառումները ընտրական գործընթացների վերաբերյալ: Դիվանագետներն այս ընտրությունները գնահատել են որոշիչ քայլ ժողովրդավարական Հայաստանի զարգացման ճանապարհին: Նրանց կարծիքով, մեր երկիրն արդեն իսկ լուրջ առաջընթաց է գրանցել ազատ եւ արդար ընտրությունների անցկացման ուղղությամբ, որն իր արտացոլումն է գտել դիտորդական առաքելությունների զեկույցներում: Օտարերկրյա դիվանագետների խոսքով, բոլոր մասնակիցների համար ստեղծված են ընտրողների հետ հանդիպելու, իրենց ծրագրերն ու տեսակետները ներկայացնելու, հեռուստաեթերից օգտվելու լայն հնարավորություններ: