«Երևան ջազ ֆեստ 2017»-ին Հայաստանը հանրահայտ երաժիշտների կհյուրընկալի

ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: «Գրեմմի» մրցանակի կրկնակի դափնեկիր, հանրահայտ բաս կիթառահար, մեգաաստղ Մարկուս Միլլերի երևանյան մենահամերգով կազդարարվի «Երևան ջազ ֆեստ 2017» ամենամյա միջազգային փառատոնի մեկնարկը: Համերգը տեղի կունենա հոկտեմբերի 26-ին Կ. Դեմիրճյանի անվան մարզահամերգային համալիրում:

«Երաժիշտը Հայաստան է ժամանելու իր խմբի հետ: Մենահամերգին ներկայացվելու են ստեղծագործություններ, որոնք շատերիս ծանոթ են: Կլինեն նաև նոր գործեր»,-«Արմենպրես»-ի հետ զրույցում նշեց «Մեցցո Պրոդաքշն»-ի տնօրեն Անի Սաղեյանը:

Նրա խոսքով` Մարկուս Միլլերից բացի փառատոնը Հայաստան կբերի նաև այլ հայտնի երաժիշտների: Սակայն տնօրենը չցանկացավ բացահայտել նրանց անունները:

«Ընդգծեմ, որ փառատոնն անցկացվում է երրորդ անգամ, և տարեցտարի ջազ երաժշտության նկատմամբ հետաքրքրությունը մեծանում է: Լինում են բազմաթիվ դրական արձագանքներ, ինչն էլ հիմք է հանդիսանում, որ մենք շարունակենք նույն էնտուզիազմով աշխատել: Կարծում եմ, նման միջոցառումները ճանաչելի են դարձնում Հայաստանն ու իրենց ներդրումն ունենում երկրի զարգացման գործում»,-ասաց Սաղոյանը:

Փառատոնն իրականացվում է Ջազի հայկական ասոցիացիայի և «Մեցցո Պրոդաքշն» ընկերության նախաձեռնությամբ:

Այս տարի այն նվիրված է հայտնի «Zildjian» բրենդի հիմնադիր Ավեդիս Զիլջյանին, ով դրել է համաշխարհային ճանաչում ունեցող հարվածային գործիքների՝ ծնծղաների արտադրության սկիզբը: