ՀՀ նախագահ Ռոբերտ Քոչարյանն ընդունել է ԻԻՀռադիոհեռուստատեսության կազմակերպության նախագահին
1 րոպեի ընթերցում
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: ՀՀ նախագահ Ռոբերտ Քոչարյանն այսօր ընդունել է Իրանի Իսլամական Հանրապետության ռադիոհեռուստատեսության կազմակերպության նախագահ Էզաթոլլահ Զարղամիին: Ինչպես «Արմենպրեսե-ին տեղեկացրին ՀՀ նախագահի մամլո գրասենյակից, շեշտելով հայ-իրանական հարաբերությունների վերընթաց զարգացումը` կողմերը գոհունակությամբ նշել են, որ համագործակցությունն աստիճանաբար ընդլայնվում է` ընդգրկելով նորանոր ոլորտներ: Անդրադառնալով Հայաստանի եւ Իրանի հարուստ պատմամշակութային ժառանգությանը` Ռոբերտ Քոչարյանն այն միմյանց ներկայացնելու գործում կարեւորել է հեռուստատեսության դերը: Ըստ նախագահի` հայ-իրանական հեռուստատեսային գործակցության հիմնական նպատակը պետք է լինի երկու երկրների մասին հանրությանը ճշգրիտ ու լայնածավալ տեղեկատվության մատուցումը, ինչը կօգնի հայ եւ իրանցի ժողովուրդներին ավելի լավ ճանաչել իրար, ծանոթանալ միմյանց մշակույթին, ավանդույթներին ու բարքերին: