1 րոպեի ընթերցում
ԵՐԵՎԱՆ, 26 ՕԳՈՍՏՈՍԻ, ԱՐՄԵՆՊՐԵՍ: Ամռան ընթացքում Մեծի Տանն Կիլիկիո Կաթողիկոսության Միաբանությունը յուրաքանչյուր շաբաթ հանդիպումներ է ունեցել, որոնց ընթացքում քննարկումներ են եղել եկեղեցական, ինչպես նաև Հայաստանին ու Սփյուռքին հուզող տարբեր հարցերի շուրջ։
Ինչպես «Արմենպրես»-ին տեղեկացրին Անթիլիասի կաթողիկոսությունից, հանդիպումները նախագահել է Ն.Ս.Օ.Տ.Տ. Արամ Ա. Վեհափառ Հայրապետը։ Յուրաքանչյուր հանդիպման ընթացքում, Արամ Ա-ի ղեկավարությամբ միաբան հայրերը մի քանի խնդիրների շուրջ զեկույցներ են պատրաստել: Զեկույցներից հետո Վեհափառ Հայրապետը իր տեսակետն է հայտնել ներկայացված թեմաների շուրջ:
«Դաստիարակչական բնույթ ունեցող այս հանդիպումները միտում ունեն լուսաբանելու միաբան հայրերին և միասնական կեցվածք ցուցաբերելու մեր եկեղեցու ու ազգի հետ առնչվող տարբեր հարցերի շուրջ»,- նշված է Անթիլիասի կաթողիկոսության հաղորդագրության մեջ։