3 րոպեի ընթերցում
ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը հուլիսի 11-ին Մայր Աթոռ Սուրբ Էջմիածնում ընդունեց Նիժնի Նովգորոդի և Արզամասի Գեորգի միտրոպոլիտին` ուղեկցությամբ Ռուսաստանի և Նոր Նախիջևանի հայոց թեմի առաջնորդ Գերաշնորհ Տ. Եզրաս արքեպիսկոպոս Ներսիսյանի: Այս մասին «Արմենպրես»-ին տեղեկացրին Մայր Աթոռի տեղեկատվական համակարգից:
Գեորգի միտրոպոլիտին ներկայացնելով Նորին Սրբությանը` Եզրաս Սրբազանն անդրադարձավ նրա գլխավորած պատվիրակության` Հայաստան և Մայր Աթոռ Ս. Էջմիածին կատարած ուխտագնացությանը, ինչպես նաև միտորոպոլիտի հետ ունեցած սերտ գործակցությանը: Սրբազանն իր խոսքում տեղեկացրեց, որ Գեորգի միտրոպոլիտը մշտապես իր մասնակցությունն է բերել հայ համայնքի կյանքում տեղի ունեցող կարևորագույն իրադարձություններին, ինչպես օրինակ` Նիժնի Նովգորոդի հայկական եկեղեցու օծման արարողությանը:
Ամենայն Հայոց Կաթողիկոսը, բարի գալուստ մաղթելով Գեորգի միտրոպոլիտին, անդրադարձավ Հայաստանյայց Առաքելական և Ռուս Ուղղափառ Եկեղեցիների միջև առկա ջերմ հարաբերություններին` համահունչ երկու բարեկամ ժողովուրդների դարավոր եղբայրական բարեկամությանը: Այս կապակցությամբ Նորին Սրբությունը գոհունակությամբ փաստեց երկու Եկեղեցիների հովվապետերի միջև առկա եղբայրական սիրո և համագործակցության մասին, որոնք իրենց անդրադարձն են ունենում նաև Եկեղեցիների միջթեմական և միջհամայնքային հարաբերությունների վրա:
Ընդունելության համար երախտագիտության խոսք ասաց Նիժնի Նովգորոդի և Արզամասի Գեորգի միտրոպոլիտը` հավաստիացնելով, որ Հայաստանում և Մայր Աթոռում իրենց զգում են ինչպես տանը, հաղորդակցվում են ոչ միայն բարձր հոգևոր արժեքներին, այլև մոտիկից զգում հայ ժողովրդի հյուրընկալ ոգին: Գեորգի միտրոպոլիտը մեծապես կարևորեց Հայ Եկեղեցու դերակատարությունն ազգային կյանքում` հավելելով, որ հայ ժողովրդի կենաց ծառը խարսխված է Հայ Եկեղեցու վրա, և առանց այդ ամուր արմատների` հավատքի և Ս. Եկեղեցու, հայ ժողովուրդը չէր կարող գոյատևել: Իր խոսքում Նիժնի Նովգորոդի և Արզամասի միտրոպոլիտն անդրադարձավ նաև տարածաշրջանի հայ համայնքի ազգային-եկեղեցական աշխույժ կյանքին:
Վերստին իր հայրապետական գնահատանքը բերելով Գեորգի միտրոպոլիտին և ներկա հոգևոր սպասավորներին` Վեհափառ Հայրապետը վստահություն հայտնեց, որ մեծապես պիտի տպավորվեն հայոց սրբավայրեր կատարած ուխտագնացությամբ` իրենց հետ տանելով անջնջելի հիշողություններ:
Վերջում Ռուս Եկեղեցու հոգևոր սպասավորները հանդես եկան հոգևոր և ժողովրդական տարբեր երգերի կատարումներով: