3 րոպեի ընթերցում
ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնի «Վաչե և Թամար Մանուկյան» մատենադարանում հունիսի 14-ին ընդունեց «Գլոբալ բրիդջիզ» միջազգային կազմակերպության անդամներին՝ ուղեկցությամբ ՀՀ-ում Գերմանիայի Դաշնային Հանրապետության արտակարգ և լիազոր դեսպան Բերնհարդ Մաթիաս Քիսլերի: Այս մասին «Արմենպրես»-ին տեղեկացրին Մայր Աթոռի տեղեկատվական համակարգից:
Հանդիպման սկզբում շնորհակալություն հայտնելով Նորին Սրբությանը ընդունելության համար` դեսպան Քիսլերը կարևորեց «Գլոբալ բրիդջիզ»-ի հերթական կոնֆերանսի անցկացումը Հայաստանում, որի նպատակն է մերձեցնել տարբեր ազգության երիտասարդների, խթանել նրանց միջև համագործությունն ու համատեղ ծրագրերի իրականացումը:
Ողջունելով հյուրերին` Ամենայն Հայոց Հայրապետը կարևորեց կազմակերպության անդամների համագործակցությունը Հայաստանի երիտասարդության հետ և հույս հայտնեց, որ նման կապերի հաստատումը դրական ներգործություն կունենա նաև տարածաշրջանի խնդիրների և մարտահրավերների հաղթահարման հարցում: Այս կապակցությամբ Ամենայն Հայոց Կաթողիկոսը, մասնավոր անդրադարձ կատարելով ղարաբաղյան հակամարտությանը, ընդգծեց, որ «Գլոբալ բրիդջիզ» կազմակերպությունը, հավատարիմ իր առաքելությանը, կարող է իր ներդրումն ունենալ հակամարտության խաղաղ կարգավորման գործընթացում՝ երկխոսություն ձևավորելով հայ և ադրբեջանցի երիտասարդության միջև:
Արգասաբեր գործունեություն և առաքելություն մաղթելով կազմակերպության անդամներին` Գարեգին Բ Վեհափառ Հայրապետն ընդգծեց, որ երիտասարդությունն ապագայի իր տեսլականով, կյանքը բարեփոխելու վճռականությամբ և նախանձախնդրությամբ պիտի կարողանա ջանքերի համադրմամբ դրական արդյունքներ արձանագրել աշխարհի բարօրության կերտման, մարդկանց խաղաղ համակեցության, ազգերի և պետությունների միջև գործակցության հաստատման ոլորտներում:
Զրույցի ընթացքում Նորին Սրբությունը, ի դեմս ՀՀ-ում Գերմանիայի դեսպանի, խորին երախտագիտություն հայտնեց Գերմանիայի իշխանություններին և ողջ ժողովրդին Բունդեսթագի կողմից Հայոց Ցեղասպանության ճանաչման բանաձևի ընդունման առնչությամբ:
Հանդիպման վերջում Ամենայն Հայոց Կաթողիկոսը պատասխանեց ներկաների հարցերին, որոնք վերաբերում էին ղարաբաղյան հակամարտությանը, Թուրքիայում ազգային և կրոնական փոքրամասնություների խնդիրներին, ինչպես նաև ժամանակակից մարտահրավերների լուծմանն ուղղված Հայաստանյայց Առաքելական Սուրբ Եկեղեցու ջանքերին:
Հանդիպմանը ներկա էր Մայր Աթոռի Արտաքին հարաբերությունների և արարողակարգի բաժնի տնօրեն Տ. Նաթան արքեպիսկոպոս Հովհաննիսյանը: