2 րոպեի ընթերցում
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Ճապոնիայում շուրջ 100 հազար ոստիկաններ են մասնակցում G7-ի երկրների գագաթնաժողովի անցկացման ընթացքում անվտանգության ապահովման միջոցառումներին, տեղեկացնում Է «Արմենպրես»-ը՝ հղում անելով NHK հեռուստաընկերությանը:
Հիմնական ուժերն ուղղված են Սիմա քաղաքում օբյեկտների պահպանությանը, որտեղ մայիսի 26-ին կսկսվի «յոթնյակի» ղեկավարների հանդիպումը: Բացի դրանից, մեծ ուշադրություն Է դարձվում հարեւան Աիտիի պրեֆեկտուրայում Տյուբու օդանավակայանի պաշտպանությանը, ուր արդեն սկսել են ժամանել համաժողովի մասնակիցները: Գագաթնաժողովի գլխավոր օբյեկտների պաշտպանության գործում ներգրավվել են ամբողջ երկրից ընտրված 23 հազար ոստիկաններ:
Եվս 70 հազար՝ կարգի ծառայողներ կպահպանեն կայարանները, խանութները, տուրիստական տեսարժան վայրերը եւ մարդկանց մեծ կուտակումների այլ վայրեր՝ ընդամենը 3,5 հազար օբյեկտ: Բացի դրանից, ԱՄՆ-ի նախագահ Բարաք Օբամայի՝ Հիրոսիմա կատարելիք այցի ընթացքում քաղաքի ոստիկանությունը կուժեղացվի եւս 4,5 հազար մարդով:
Ղեկավարների հիմնական հանդիպումները տեղի կունենան Կասիկո կղզում գտնվող հյուրանոցում, կղզի, որը վարչականորեն պատկանում Է Սիմա քաղաքին: «Յոթնյակի» անդամ երկրների Իսե-Սիմա գագաթնաժողովը տեղի կունենա մայիսի 26 – 27-ը Միեի պրեֆեկտուրայում, հաղորդել Է ՌԻԱ Նովոստին: