2 րոպեի ընթերցում
ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Ժնևում մայիսի 23-ին կմեկնարկի Առողջապահության համաշխարհային ասամբլեայի 69-րդ նիստը: Առողջապահության համաշխարհային կազմակերպության բարձրագույն վեհաժողովը միավորում է բոլոր անդամ պետություններին:
Նիստի ընթացքում կքննարկվեն առողջապահական տեսանկյունից առավել անվտանգ միջավայր ստեղծելու կարևոր նախադրյալները, համաշխարհային նշանակության առաջնահերթ խնդիրները, ինչպես նաև կմշակվեն աշխատանքի ուղղություններ, որոնք ցանկալի են, որպեսզի անդամ երկրներն ապագայում իրականացնեն:
Ասամբլեային որպես հրավիրված փոխնախագահ մասնակցում է նաև ՀՀ առողջապահության նախարար Արմեն Մուրադյանը: Ի դեպ, Հայաստանն առաջին անգամ է մասնակցում նիստին փոխնախագահող երկրի կարգավիճակով: Այս մասին «Արմենպրես»-ին տեղեկացրին ՀՀ առողջապահության նախարարությունից:
ՀՀ առողջապահության նախարարը հանդես կգա որպես եվրոպական տարածաշրջանի կողմից առաջադրված ասամբլեայի փոխնախագահ: Համաձայն կանոնադրության` Առողջապահության համաշխարհային ասամբլեան ընտրում է նախագահ և հինգ փոխնախագահ` ԱՀԿ յուրաքանչյուր տարածաշրջանից: Յուրաքանչյուր փոխնախագահ համանախագահելու է առողջապահության ասամբլեայի նիստեր: Հանդես գալով որպես փոխնախագահ` ՀՀ առողջապահության նախարարը նաև գլխավոր կոմիտեի անդամ է:
ԱՀԿ ասամբլեայի 69-րդ նիստը կանցկացվի մայիսի 23-28-ը: