3 րոպեի ընթերցում
ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Նախագահ Սերժ Սարգսյանին նոյեմբերի 27-ին իր հավատարմագրերն է հանձնել Դանիայի Թագավորության արտակարգ և լիազոր դեսպան Քրիստիան Դոնս Քրիստենսենը (նստավայրը՝ Կիև): Ինչպես «Արմենպրես»-ին տեղեկացրին ՀՀ նախագահի աշխատակազմի հասարակայնության եւ տեղեկատվության միջոցների հետ կապերի վարչությունից, Նախագահը շնորհավորել է դեսպանին նշանակման կապակցությամբ և հաջողություններ մաղթել մեր երկրում դիվանագիտական առաքելությունն իրականացնելու գործում: Սերժ Սարգսյանը նշել է, որ Հայաստանը պատրաստակամ է խորացնել հարաբերությունները Դանիայի Թագավորության հետ ինչպես երկկողմ, այնպես էլ բազմակողմ ձևաչափերով:
Հանրապետության Նախագահը միջպետական հարաբերությունների զարգացման տեսանկյունից կարևորել է երկու երկրների միջև տարբեր ոլորտներում փոխգործակցության զարգացմանն ուղղված իրավապայմանագրային դաշտի ընդլայնումը, բարձր մակարդակի ակտիվ փոխայցելությունները, միջխորհրդարանական կապերի խորացումը, ինչպես նաև միջազգային կառույցների շրջանակներում սերտ համագործակցությունը:
Նախագահը շնորհակալություն է հայտնել Դանիայի Թագավորությանը՝ Հայաստանում իրականացվող ժողովրդավարական բարեփոխումներին մինչ այժմ ցուցաբերված աջակցության համար: Սերժ Սարգսյանն ընդգծել է, որ հայ ժողովուրդը մեծապես գնահատում է ս.թ. ապրիլի 19-ին Կոպենհագենի Մայր տաճարում Հայոց ցեղասպանության 100-րդ տարելիցին նվիրված էկումենիկ աղոթքի արարողության կազմակերպման գործում Դանիայի աջակցությունը և կարևորում է Հայոց ցեղասպանության վերաբերյալ երկրի խորհրդարանի ընդունած հայտարարությունը, որը, Նախագահի համոզմամբ, Ցեղասպանության ճանաչման գործընթացի ուղղությամբ կարևոր քայլ է:
Դանիայի դեսպանը շնորհակալություն է հայտնել ՀՀ Նախագահին ջերմ ընդունելության ու շնորհավորանքի համար և հավաստիացրել, որ իր պաշտոնավարման ամբողջ ընթացքում ջանք չի խնայի խորացնելու հայ-դանիական մեծ ներուժ ունեցող համագործակցությունը և ամրապնդելու երկկողմ հարաբերությունները: Դեսպան Քրիստենսենն ընդգծել է, որ Դանիան Հայաստանը դիտարկում է որպես լավ գործընկեր, ում հետ անհրաժեշտ է զարգացնել սերտ փոխգործակցություն:
Հանդիպմանը ՀՀ Նախագահը և Դանիայի դեսպանն անդրադարձել են նաև տարածաշրջանային և միջազգային արդի խնդիրներին, ԼՂ հիմնախնդրի խաղաղ կարգավորման գործընթացին: