2 րոպեի ընթերցում
ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: Աշխարհի 60 երկրների ավելի քան 300 ֆիլմեր են ներկայացվելու Տորոնտոյում բացվող հոբելյանական 40-րդ միջազգային կինոփառատոնում (Toronto International Film Festival, TIFF): Կանադայի խոշորագույն մեգապոլիսում կինոստուգատեսի հյուրերի թվում կլինեն նաեւ հոլիվուդյան հայտնիները, ներառյալ Ջոնի Դեփը, Մեթ Դեյմոնը, Ջուլիանա Մուրը, Քրիստոֆեր Ուոքենը, Նատալի Փորթմանը, Սանդրա Բուլոկը, Սթիվ Մարտինը եւ շատ ուրիշներ:
«Փառատոնը մեկնարկելու Է կանադացի ռեժիսոր Ժան Մարկ Վալլեի «Ավերածություն» ֆիլմի համաշխարհային պրեմիերայով»,-ՏԱՍՍ-ին հայտնել են կինոստուգատեսի կազմկոմիտեում: Այս ֆիլմում գլխավոր դերերը խաղացել են Ջեյք Ջիլենհոլը եւ Նաոմի Ուոթսը: Ժապավենը պատմում Է ներդրումային բանկիրի մասին, որը դեպրեսիայի մեջ Է ընկել ամուսնու զոհվելուց հետո: «Սա շատ ուժեղ ու ողբերգական պատմություն Է, որը գրված Է մարդկային հոգեբանությունը հասկանալու, մեր բացառիկությունը, մեր առանձնահատությունները գիտակցելու անկեղծ ցանկությամբ եւ փորձել հասկանալու, թե ինչն Է մեզ ստիպում սիրել»,-ֆիլմն այսպես Է բնութագրում ռեժիսորն ինքը: Շատ քննադատներ արդեն կանխագուշակում են, որ «Ավերածությունը» կդառնա «Օսկար» մրցանակի գլխավոր հավակնորդներից մեկը:
Կինոփառատոնի գլխավոր մրցանակը բաժին կհասնի այն կինոնկարին, որը կհաղթի հանդիսատեսների քվեարկության արդյունքում: Անցած տարի հանդիսատեսների համակրանք մրցանակն ստացել Է նորվեգացի ռեժիսոր Մորտեն Տիլդումի «Խաղի նմանակում» կինոդրաման: