Ավստրալիան ավիահարվածներ կհասցնի Սիրիայում ԻՊ-ի զինյալների դիրքերին

ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Ավստրալիայի ռազմաօդային ուժերի ինքնաթիռները կմասնակցեն Սիրիայի տարածքում «Իսլամական պետություն» ահաբեկչական խմբավորման զինյալների դիրքերին ավիահարվածներ հասցնելուն: Այդ մասին, ինչպես տեղեկացնում է «Արմենպրես»-ը, սեպտեմբերի 9-ին հայտարարել է երկրի վարչապետ Թոնի Էբոտը:

Նրա խոսքով՝ կառավարությունը որոշում է ընդունել դրական պատասխան տալ այդ ռազմական գործողությանը միանալու ԱՄՆ-ի խնդրանքին:

Ներկայում Արաբական Միացյալ Էմիրությունների ռազմաօդային ուժերի Մինհադ ռազմակայանում տեղակայված է Ավստրալիայի ութ ինքնաթիռ եւ օդուժի 400 մարդուց բաղկացած ստորաբաժանում: Մինչ այժմ այդ ինքնաթիռները ԻՊ-ի դիրքերին հարվածներ էին հասցնում միայն Իրաքի տարածքում, հաղորդել է ՏԱՍՍ-ը: