1 րոպեի ընթերցում
ԵՐԵՎԱՆ, 19 ՕԳՈՍՏՈՍԻ, ԱՐՄԵՆՊՐԵՍ: Ամերիկյան Heritage Auctions աճուրդային տունը վաճառքի է հանում ձայնագրող ընկերության հետ առաջին պարտավորագիրը, որն ստորագրել են The Beatles բրիտանական խմբի անդամները: Ինչպես ՏԱՍՍ-ի թղթակցի հետ զրույցի ժամանակ հայտնել է աճուրդային տան լոտերի գնահատման եւ իրացման հարցերով տնօրեն Դին Հոյերմայերը, աճուրդում, որն այս տարվա սեպտեմբերի 19-ին տեղի է ունենալու Նյու Յորքում, փաստաթղթի արժեքը կարող է գերազանցել 150 հազար դոլարը:
«Պարտավորագիրը 1961 թվականին կնքվել է The Beatles-ի եւ գերմանացի պրոդյուսեր Բերտ Քեմփֆերթի միջեւ, որը ներկայացնում էր Polydor ձայնագրման ընկերությունը,- նշել է Հոյերմայերը:- Այն գրված է գերմաներենով եւ բաղկացած է վեց էջից»: «Միանգամայն հնարավոր է, որ այն կվաճառվի ավելի մեծ գումարով, քան 150 հազար դոլարը,- ընդգծել է նա:- Հարկ է հաշվի առնել, որ սա եզակի փաստաթուղթ է, գուցեեւ ամենաարժեքավորը նրանցից, որոնք վերաբերում են խմբին եւ երբեւիցե աճուրդի են հանվել»:
The Beatles խումբն ստեղծվել է 1960 թվականին: Դրա կազմի մեջ մտնում էին Ջոն Լենոնը, Փոլ Մաքքարթնին, Ջորջ Հարիսոնը եւ Փիթեր Բեսթը, որին 1962 թվականին փոխարինեց Ռինգո Սթարը: