2 րոպեի ընթերցում
ԵՐԵՎԱՆ, 24 ՀՈւԼԻՍԻ, ԱՐՄԵՆՊՐԵՍ: Վարչապետ Հովիկ Աբրահամյանը հուլիսի 24-ին ընդունել է Հայաստանի Հանրապետությունում Թուրքմենստանի նորանշանակ արտակարգ և լիազոր դեսպան Մուհամեդնիյազ Մաշալովին: Ինչպես «Արմենպրես»-ին տեղեկացրին ՀՀ կառավարության տեղեկատվության եւ հասարակայնության հետ կապերի վարչությունից, Հովիկ Աբրահամյանը շնորհավորել է Մուհամեդնիյազ Մաշալովին դեսպանի պաշտոնն ստանձնելու կապակցությամբ և հաջողություն մաղթել դիվանագիտական առաքելության մեջ: Վարչապետը բարձր է գնահատել հայ-թուրքմենական միջպետական հարաբերությունների ներկա մակարդակը և համոզմունք հայտնել, որ դեսպան Մաշալովն իր աշխատանքով կնպաստի քաղաքական, տնտեսական, գործնական, գիտական, մշակութային, հումանիտար և այլ ոլորտներում համագործակցության էլ ավելի ամրապնդմանը և խորացմանը:
Դեսպան Մաշալովը շնորհակալություն է հայտնել վարչապետին ընդունելության համար և հավաստիացրել, որ պաշտոնավարման ընթացքում կգործադրի ամեն ջանք տարբեր ոլորտներում փոխգործակցությունը խորացնելու և երկկողմ կապերն առավել սերտացնելու ուղղությամբ:
Զրուցակիցներն անհրաժեշտ են համարել է տնտեսական կապերի ակտիվացումը, առկա ներուժի լիարժեք օգտագործումը և այս առումով կարևորել միջկառավարական հանձնաժողովի աշխատանքը: Հանդիպման ընթացքում անդրադարձ է կատարվել երկկողմ հետարքրքրություն ներկայացնող այլ հարցերի ևս: