1 րոպեի ընթերցում
ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: Շվեդիայի մայրաքաղաք Ստոկհոլմի «Տելե 2 Արենա» մարզադաշտում ավարտվեց ՈՒԵՖԱ-ի Եվրոպա լիգայի 2015/2016 թթ. խաղարկության որակավորման երկրորդ փուլի առաջին հանդիպումը շվեդական ԱԻԿ-ի և Գյումրիի«Շիրակի» միջև. «ԱԻԿ»-«Շիրակ» 2-0:
25-րդ րոպեին շվեդական ակումբի ֆուտբոլիստները վաստակեցին 11-մետրանոց հարվածի իրավունք, սակայն Բանգուրայի հարվածից հետո Վսեվոլոդ Երմակովը կարողացավ հետ մղել գնդակը: Այդուհանդերձ, 29-րդ րոպեին Հենոկ Գոյտոմն առաջ մղեց դաշտի տերերին՝ 1:0: 69-րդ րոպեին«Շիրակը» մնաց 10 ֆուտբոլիստներով, երբ խաղադաշտից հեռացվեց Արման Հովհաննիսյանը, իսկ 80-րդ րոպեին հանդիպման գլխավոր մրցավարը գյումրեցիներին թողեց 9 ֆուտբոլիստներով՝ կարմիր քարտ ցույց տալով Գոռ Մալաքյանին: 83-րդ րոպեին տանտերերը ստացան 11-մետրանոց հարվածի իրավունք, և Հենոկ Գոյտոմը դուբլ ձևակերպեց այս խաղում՝ 2:0: 85-րդ րոպեին գյումրեցիները մնացին 8 ֆուտբոլիստներով, երբ խաղադաշտից հեռացվեց Անդրանիկ Բարիկյանը: Չնայած շվեդական ակումբի գործադրած ջանքերին՝ հանդիպումն այդպես էլ ավարտվեց ԱԻԿ-ի հաղթանակով՝ 2:0 հաշվով:
«Արմենպրես»-ի հաղորդմամբ, այս թիմերի միջև պատասխան հանդիպումը կկայանա հուլիսի 23-ին: