2 րոպեի ընթերցում
ԵՐԵՎԱՆ, 15 ՀՈՒԼԻՍԻ, ԱՐՄԵՆՊՐԵՍ: Թուրքիայի հայտնի հայ լրագրող Հայկո Բաղդաթը դատական գործ է հարուցել Անկարայի քաղաքապետ Մելիհ Գյոքչեքի նկատմամբ սոցիալական հարթակներում հայերի մասին ոչ պատշաճ հայտարարություններ անելու առնչությամբ: Ինչպես հաղորդում է «Արմենպրես»-ը, այս մասին տեղեկացնում է թուրքական Demokrathaber.net-ը:
Դատարան ներկայացրած հայցում Բաղդաթը պահանջել է Անկարայի քաղաքապետից վճարել 10 հազար թուրքական լիրա փոխհատուցում:
Անկարայի քաղաքապետ Մելիհ Գյոքչեքը սոցիալական ցանցերում բազմիցս հայերին վիրավորող հայտարարություններով է հանդես եկել: Օրինակ, երբ Գերմանիայի Կանաչների կուսակցության `ծագումով թուրք համանախագահ Ջեմ Օզդեմիրը կոչ արեց Թուրքիային հայ-թուրքական սահմանը բացելու, Ցեղասպանությունը ճանաչելու և Հայաստանի հետ հարաբերություններ հաստատելու վերաբերյալ, Գյոքչեքը այս առնչությամբ ռասիստական գրառում թողեց «Թվիթեր»-ի իր միկրոբլոգում: Գրառման մեջ Գյոքչեքը խնդրեց Ջեմ Օզդեմիրին պարզաբանել` արդյոք նրա ծագման մեջ կա՞ն հայկական արմատներ: Անկարայի քաղաքապետի կողմից նման ռասիստական գրառում անելը ապացուցեց, որ Թուրքիայում «հայ» որակումը շարունակում է դիտարկվել որպես վիրավորանք և անարգանք:
Մեկ այլ անգամ քաղաքապետը Ստամբուլում քրդերի Ժողովուրդների դեմոկրատական կուսակցության ցույցից առաջ հայտարարել էր, որ քրդական կուսակցության հանրահավաքին մասնակցելու նպատակով Եվրոպայից և Հայաստանից 150-200 հայեր են պատրաստվում գալ Ստամբուլ: «Ի՞նչ գործ ունեն նրանք հանրահավաքին: Քանի որ նրանք դա դիտարկում են որպես Հայաստանի փրկության ցույց: Ինձ լսող իմ քուրդ եղբայրներ՝ մի’ գնացեք այդ հանրահավաքին, քանի որ դա քրդերի հանրահավաքը չէ, հայերինն է»,- ասել էր Գյոքչեքը: