Սիրիական բանակը «Հըզբոլլահի» հետ նոր հաջողություններ է գրանցել

ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Սիրիական բանակը և «Հըզբոլլահը» հունիսի 12-ին վերահսկողություն են հաստատել Ջարաջիրի բարձունքների Կարնա Շաաբ ան Նուսուբ, Աբու Հարբ և Կարնա Սամաան տեղանքների վրա: Ինչպես հաղորդում է «Արմենպրես»-ը` վկայակոչելով արաբական լրատվամիջոցները, բախումների ընթացքում ահաբեկիչները լուրջ վնասներ են կրել. նրանց շարքերում կան տասնյակ սպանվածներ ու վիրավորներ:Ավելի վաղ Ջարաջիրի բարձունքներումհամատեղ ուժերով ազատագրվել էին Թամսեթ ուադի Ահմար, Քըրնեթ ուադի Ահմար շրջանները:

«Հըզբոլլահը» Ռաս ալ Բաալբեքում շարունակում է պայքարել ԻՊ-ի դեմ` խմբավորմանը պատճառելով լուրջ վնասներ:

Սիրիական բանակը «Հըզբոլլահի» հետ հունիսի 10-ին վերահսկողություն էր հաստատել Դամասկոսի վարչական տարածքի Կալամունի շրջանում գտնվող Բլոսքաթ բարձունքների վրա:

Բանակը «Հըզբոլլահի» հետ վերջին շրջանում լուրջ վնասներ է հասցնում ահաբեկչական խմբավորումներին` ազատագրելով տարածքներ սիրիա-լիբանանյան սահմանին:

Բացի այդ, Սիրիայում 90 զինյալներ վայր են դրել զենքերը և հանձնվել իշխանություններին: Զինյալները Դամասկոսից են, ինչպես նաև մայրաքաղաքի մերձակա գյուղերից, Հոմսից, Համայից: