2 րոպեի ընթերցում
ԵՐԵՎԱՆ, 10 ՀՈՒՆԻՍԻ, ԱՐՄԵՆՊՐԵՍ: Սիրիական բանակը, «Հըզբոլլահի» հետ համագործակցելով, հունիսի 10-ին վերահսկողություն է հաստատել Շաաբա ատ Տամս, Շաաբա ՈՒադի ալ Ահմար, Կարնա Ուադի ալ Ահմար տեղանքների վրա՝ Ջարաջիրի բարձունքներում: Ինչպես հաղորդում է «Արմենպրես»-ը, վկայակոչելով սիրիական ՍԱՆԱ գործակալությունը, տարածքներն ազատագրվել են թեժ մարտերի արդյունքում:
«Հըզբոլլահը» նախորդ օրերի ընթացքում մեծ տարածքներ էր ազատագրել «Ջաբհա ան Նուսրա»-ից Արսալի բարձունքներում, և այժմ փորձում է գործողություններ սկսել ԻՊ-ի դեմ: Նախօրեին բախումներ են ընթացել «Հըզբոլլահի» և ԻՊ-ի միջև:
Դամասկոսի վարչական շրջանի հարավ-արևմուտքում «Ջաբհա ան Նուսրա»-ի թաքստոց է ոչնչացվել: Ռազմական աղբյուրների տեղեկացմամբ՝ բանակի ստորաբաժանումներից մեկը հարվածել է ծայրահեղական խմբավորման թաքստոցին, ինչի արդյունքում տասնյակ ահաբեկիչներ են սպանվել ու վիրավորվել: Խան աշ Շեյխ գյուղաքաղաքում և Հուսեյնիայ գյուղի ագարակներում ոչնչացվել են նրանց տարբեր տեսակի զենքերը:
Վերջին շրջանում սիրիական բանակը «Հըզբոլլահի» հետ բավական մեծ հաջողությունների էր հասել Լիբանանի բարձունքներում և Կալամունի շրջանում:
«Իսլամական պետությունը» հունիսի 10-ին վերահսկողություն է հաստատել Հոմսի նահանգի Թադմուր քաղաքի մոտ գտնվող նավթահորերի վրա: