Արմեն Մուրադյանը ստվերային հարաբերություններից խուսափելու մեթոդ է համարում գործավարձի սկզբունքը
1 րոպեի ընթերցում
ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: ՀՀ առողջապահության նախարարությունը քայլեր է ձեռնարկում առողջապահական ոլորտում ստվերային հարաբերություններից հնարավորինս խուսափելու ուղղությամբ: Այս մասին Ազգային ժողովում լրագրողների հետ զրույցում ասաց ՀՀ առողջապահության նախարար Արմեն Մուրադյանը՝ անդրադառնալով տարբեր բուժհաստատություններում ստվերային հարաբերություննեի առկայության վերաբերյալ հարցին: «Իրականում նման երևույթները միանգամից վերացնելը շատ դժվար է, սակայն մենք այդ ուղղությամբ աշխատում ենք և փորձում ենք արդյունավետ միջոցներ ձեռնարկել՝ նման երևույթներից հնարավորինս խուսափելու ուղղությամբ»,- «Արմենպրես»-ի հաղորդմամբ՝ նշեց նախարարը:
Նա ընդգծեց, որ առողջապահության ոլորտում ստվերային երևույթների դեմ պայքարի արդյունավետ միջոց է գործավարձի՝ կատարած աշխատանքի համար աշխատավարձով փոխհատուցման մեթոդը: Նախարարի խոսքով՝ այս մեթոդի կիրառման արդյունքում վճարովի ծառայությունների և ստվերից դուրս ծառայությունների գումարներն ավելի երևացող են դարձել:
Արմեն Մուրադյանն ընգծեց, որ դեռևս կան հիմնարկներ, որոնք չեն կիրառում գործավարձի մեթոդը, սակայն դա այն ճանապարհն է, որը թույլ կտա հնարավորինս խուսափել ստվերային հարաբերություններից: