1 րոպեի ընթերցում
ԹԵՀՐԱՆ, 30 ԱՊՐԻԼԻ, ԱՐՄԵՆՊՐԵՍ: ԻԻՀ խորհրդարանի անվտանգության եւ արտաքին քաղաքականության հանձնաժողովի նախագահ Բորուջերդին այցելել է Թեհրանի Հայոց թեմի առաջնորդարան եւ հանդիպել Թեհրանի Հայոց թեմի առաջնորդ Սեպուհ արքեպիսկոպոս Սարգսյանին, խորհրդարանի հայազգի պատգամավորների եւ հայ համայնքի ներկայացուցիչների հետ: Ինչպես հաղորդում է «Արմենպրես»-ը՝ վկայակոչելով «Ալիք»-ը, Բորուջերդին, անդրադառնալով Հայոց ցեղասպանության խնդրին, շեշտել է, որ որեւէ ժողովրդի դեմ գործադրվող հալածանքները, ճնշումներն ու սպանդն անընդունելի են եւ դատապարտելի:
Խորհրդարանի Անվտանգության հանձնաժողովի նախագահն իր ելույթում կարեւորել է իրանահայության դերն ու հիշատակել այն փաստը, որ Իրան-Իրաք պարտադրված պատերազմի ժամանակ առաջին գծում քիչ չէին իրանահայերը: «Երբեմն մտածում ես, որ անվտանգության հարցում իրանահայերն ավելի բծախնդիր մոտեցումներ ունեն, քան որեւէ այլ մեկը կարող էր ունենալ»: