Ֆրանսիայի խոշոր քաղաքներում Ցեղասպանության 100-րդ տարելիցը կհիշատակվի խոշոր միջոցառումներով և ցույցերով
2 րոպեի ընթերցում
ՓԱՐԻԶ, 23 ԱՊՐԻԼԻ, ԱՐՄԵՆՊՐԵՍ: Ֆրանսիայի խոշոր քաղաքներում` Փարիզում, Մարսելում և Լիոնում կանցկացվեն Հայոց ցեղասպանության 100-րդ տարելիցին նվիրված խոշոր միջոցառումներ: Ինչպես հաղորդում է «Արմենպրես»-ը` վկայակոչելով Nouvelles d`Armenie-ն, ապրիլի 24-ին Երևանի ժամանակով 20:30-ին Փարիզում` Կոմիտասի արձանի մոտ տեղի ունենալիք ոգեկոչման միջոցառմանը կմասնակցեն հազարավոր ֆրանսահայեր: Բացի այդ, ներկա կլինեն նաև Ֆրանսիայի վարչապետ Մանուել Վալսը և Փարիզի քաղաքապետ Անն Հիդալգոն: Կոմիտասի արձանի մոտ տեղի ունենալիք միջոցառումից հետո հավաքվածները կուղևորվեն Ֆրանսիայիում Թուրքիայի դեսպանատուն, որտեղ տեղի կունենա բողոքի մեծ ակցիա` պահանջելով թուրքական կառավարությունից առերեսվել սեփական պատմությանն ու ընդունել Հայոց ցեղասպանության փաստը:
Իր հերթին, Լիոնի հայությունն ապրիլի 23-ին Երևանի ժամանակով 21-ին բողոքի ցույց կանցկացնի Լիոնում Թուրքիայի հյուպատոսության առջև: «Եկեք այս պայքարում լինենք միասնական` հանուն արդարության: Վերապրածների սերունդները պետք է արդարադատության եւ փոխհատուցման իրենց պահանջները բարձրաձայնեն: Հիշողության, մեր ընտանիքների, ինքնության ու մշակույթի պաշտպանությունը մեր գլխավոր խնդիրն է: Մեր հավաքը կարեւոր է. պայքարը շարունակվում է»,- ասված է ՀՅԴ Ֆրանսիայի «Նոր սերունդ» կազմակերպության հայտարարության մեջ:
Ապրիլի 24-ին մարսելահայությունը Երևանի ժամանակով 14:00-ին կհավաքվի Կաստելեն հրապարակում` կրելով սև հագուստներ, ի նշան Հայոց ցեղասպանության սգո օրվա:
Ֆրանսիայի նախագահ Ֆրանսուա Օլանդը կժամանի Երևան` մասնակցելու Ծիծեռնակաբերդի հուշահամալիրում կայանալիք ոգեկոչման արարողությանը: