Արմեն Մուրադյանն անձամբ է պատասխանել նախարարության «Թեժ գծի» հեռախոսազանգերին

ԵՐԵՎԱՆ, 24 ՄԱՐՏԻ, ԱՐՄԵՆՊՐԵՍ: Քաղաքացիների կողմից բարձրացված հարցերին անձամբ ծանոթանալու նպատակով, մարտի 24-ի առավոտյան ՀՀ առողջապահության նախարության «Թեժ գիծ» ծառայության հեռախոսազանգերին պատասխանել է նախարար Արմեն Մուրադյանը: Ինչպես «Արմենպրես»-ին տեղեկացրին ՀՀ առողջապահության նախարարությունից, նա լսել է շուրջ մեկ տասնյակ քաղաքացիների հարցեր: Որոշ հարցերի առնչությամբ նախարարության համապատասխան ստորաբաժանումների ղեկավարներին տրվել են հանձնարարականներ:

Օրական «Թեժ գիծ» շուրջօրյա ծառայությունը ստանում է 60-70 հեռախոսազանգ: Արձանագրված բոլոր դիմում-բողոքներն ուսումնասիրվում են և ստանում համապատասխան լուծումներ: Քաղաքացիների կողմից հնչեցված հարցերի, առաջարկությունների և բողոքների մասին ամեն օր զեկուցվում է ՀՀ առողջապահության նախարարին և նախարարության աշխատակազմի ղեկավարին: