2 րոպեի ընթերցում
ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: ՀՀ առողջապահության նախարարության Պրոֆ. Ռ. Հ. Յոլյանի անվան արյունաբանական կենտրոնում շարունակվում են հիմնական մասնաշենքի վերակառուցման և եռահարկ նոր մասնաշենքի կառուցման աշխատանքները: Ինչպես «Արմենպրես»-ին տեղեկացրին ՀՀ առողջապահության նախարարության լրատվական ծառայությունից, նախարար Արմեն Մուրադյանն կրկին այցելել է շինհրապարակ: Կենտրոնի տնօրեն Սմբատ Դաղբաշյանը նախարարին ներկայացրել է 2014 թվականի ապրիլից մեկնարկած շինարարական աշխատանքների ընթացքը:
Նախարարը կարևորել է իրականացվող աշխատանքների պատշաճ որակը, ինչպես նաև ժամկետների ապահովումը:
Երկհարկանի ախտորոշիչ մասնաշենքի տեղում կառուցվող եռահարկ շենքում կտեղակայվի ցողունային բջիջների պատրաստման և սառեցման լաբորատորիան, որը կբավարարի ISO և GMP միջազգային չափորոշիչների պահանջներին: Հիմնանորոգվող յոթհարկանի բուժական մասնաշենքում այս փուլում կատարվում են հարդարման աշխատանքներ:
Պրոֆ. Ռ. Հ. Յոլյանի անվանարյունաբանական կենտրոնի արդիականացումը, ինչպես նաև ոսկրածուծի և ցողունային բջիջների փոխպատվաստման և բարձր դեղաչափային քիմիաթերապիայի բաժանմունքի ստեղծումն իրականացվում են «Հայաստանի առողջապահական համակարգի արդիականացում» և «Հիվանդությունների կանխարգելում և կառավարում» ծրագրի շրջանակում: Ծրագրով նախատեսված է նաև բժշկական անձնակազմի կրթում` միջազգային և տեղի մասնագետների կողմից, ինչպես նաև բուժման ուղեցույցերի մշակում: