ՀՀ նախագահ Ռոբերտ Քոչարյանը եւ պետական բուհերի ռեկտորները քննարկելեն բուհական համակարգում իրականացվող բարեփոխումների ընթացքն ու հետագաքայլերը
2 րոպեի ընթերցում
ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: Բուհական համակարգում իրականացվող բարեփոխումների ընթացքն ու հետագա քայլերն են քննարկվել ՀՀ նախագահ Ռոբերտ Քոչարյանի եւ պետական բուհերի ռեկտորների այսօր կայացած հանդիպմանը: Ինչպես «Արմենպրեսե-ին տեղեկացրին ՀՀ նախագահի մամլո գրասենյակից, մասնավորապես խոսվել է Հայաստանի` Բոլոնիայի գործընթացին միանալու, կրթական երկաստիճան եւ կրեդիտային համակարգերի ներդրման ընթացքում ի հայտ եկած խնդիրների եւ դրանց լուծման ուղիների մասին: Նախագահն ասել է, որ կարճ ժամկետում պետք է վերջնականապես հստակեցնել այս նորամուծությունների հետ կապված հարցերը եւ գտնել դրանց լուծումները, որպեսզի հասարակությանը, հատկապես ուսանողներին ու ապագա դիմորդներին պարզ լինի առաջարկվող հնարավորությունների եւ առաջադրվող պայմանների շրջանակը: Ռոբերտ Քոչարյանը հետաքրքրվել է նաեւ ուսուցման նոր տեխնոլոգիաների կիրառման, բուհական մասնագիտությունների գծով ժամանակակից գրականության առկայության խնդիրներով: Նախագահի խոսքով, անհրաժեշտ է համապարփակ մոտեցում ցուցաբերել ուսանողներին մասնագիտական նոր, բազային ձեռնարկներով ապահովելու հարցում, այլապես միայն կառուցվածքային փոփոխությունները բեկում չեն մտցնի կրթության որակի բարձրացման գործում: Ռոբերտ Քոչարյանն ասել է, որ ռեկտորներից ակնկալում է դինամիկ, համագործակցված եւ նպատակաուղղված աշխատանք` բուհական բարեփոխումներն առանց ժամանակի կորստի եւ վրիպումների անցկացնելու համար: