2 րոպեի ընթերցում
ԵՐԵՎԱՆ, 11 ՍԵՊՏԵՄԲԵՐԻ, ԱՐՄԵՆՊՐԵՍ: Սիրիայի Նախագահ Բաշար ալ Ասադը սեպտեմբերի 11-ին ընդունել է ՄԱԿ-ի նորանշանակ բանագնաց Ստեֆան դի Միստուրային և նրան ուղեկցող պատվիրակությանը: Ինչպես հաղորդում է «Արմենպրես»-ը՝ վկայակոչելով սիրիական ՍԱՆԱ գործակալությունը, հանդիպման ընթացքում Ասադը նշել է, որ իր կառավարությունը պատրաստ է շարունակել աշխատել և աջակցել ՄԱԿ-ի բանագնացին` իր պարտականությունների կատրարման ընթացքում հաջողություն գրանցելու համար: Նա ավելացրել է, որ Միստուրայի հաջող աշխատանքը հաջողություն կհամարվի նաև Սիրիայի և իր ժողովրդի համար:
Սիրիայի նախագահն ընդգծել է, որ առաջնայինը պայքարն է ահաբեկչության դեմ, որը սպառնում է բոլորին,և այդ հարցում առաջընթացը կնպաստի ազգային հաշտեցմանը: Ասադի խոսքով` հաշտեցման գործընթացում հաջողություններ են գրանցվել Սիրիայի տարբեր շրջաններում:
Իր հերթին Միստուրան նշել է, որ ջանքի չի խնայի աշխատելու բոլոր կողմերի հետ Սիրիայի ներսում և Սիրիայից դուրս` հանուն ճգնաժամի խաղաղ ճանապարհով լուծման: Նրա և Ասադի հանդիպմանը ներկա էր նաև Սիրիայի արտաքին գործերի նախարար Ուալիդ ալ Մուալեմը, Նախագահի քաղաքական և տեղեկատվական հարցերով խորհրդական Բասինա Շաաբանը, արտաքին գործերի փոխնախարար Ֆեյսալ ալ Միկդադը:
Ավելի վաղ Ստեֆան դի Միստուրան հանդիպել էր Սիրիայի արտգործնախարարի հետ: