398.74
Հալեպի արդյունաբերության նախարարը խոստացել է փոխհատուցել ավերված գործարանների համար
2 րոպեի ընթերցում
ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: Հալեպի արդյունաբերության նախարար Քամալ ադ Դին Տաաման այցելել է սիրիական բանակի ազատագրած Շեյխ Նաջջար գործարանային թաղամաս՝ անձամբ ականատես լինելու գործարանների վիճակին: Ինչպես հաղորդում է «Արմենպրես»-ը, վկայակոչելով սիրիական ՍԱՆԱ գործակալությունը, այցելության ժամանակ նախարարը նշել է, որ կառավարությունը նյութական օժանդակություն կտրամադրի գործարարներին` կրած վնասները փոխհատուցելու և հնարավորինս սեղմ ժամկետում ճարտարագիտական ընկերությունների տեղակայմանշրջանը վերականգնելու ուղղությամբ: Նախարարի հետ Շեյխ Նաջջար շրջան էր այցելել նաև Հալեպի մարզպետը:
Սիրիական աղբյուրների տեղեկացմամբ` գործարանների մի մասն ավերված է, մյուսը մասը՝ կողոպտված: Հսկայական ավար տեղափոխվել է Թուրքիա:
Հալեպի մարզպետը նշել է, որ առաջիկա մի քանի օրերի ընթացքում Հալեպի ջրամատակարարումը կբարելավի. այժմ ակտիվ աշխատանքներ են տարվում ջրատար խողովակները նորոգելու ուղղությամբ:
Ավելի վաղ տեղեկություններ էին ստացվել, որ Շեյխ Նաջջար շրջանում գոյություն ունեին նաև հայերի շատ գործարաններ: Սիրիայի ճարտարագիտության գլխավոր ոստանը համարվող Հալեպը, մասնավորապես գործարանների շրջան Շեյխ Նաջջարը` տեղի գործարաններովը և արտադրողական կենտրոններով, բախումների պատճառով ավերվել է: Այդ իսկ պատճառով շատ հայ արհեստավորներ ու գործարանատերեր կորցրել են միլիարդներ արժեցող իրենց աշխատանքը, կալվածքը և ունեցվածքը:
Բաժանորդագրվեք մեր ալիքին Telegram-ում