2 րոպեի ընթերցում
ԵՐԵՎԱՆ, 24 ՀՈւՆԻՍԻ, ԱՐՄԵՆՊՐԵՍ: Սիրիական բանակը Իդլեբի շրջանում թեժ մարտեր է վարում զինված խմբավորումների դեմ: Ինչպես հաղորդում է «Արմենպրես»-ը, վկայակոչելով սիրիական ՍԱՆԱ գործակալությունը, Իդլեբի Հաջ Մահմուդ գյուղում տասնյակ զինյալներ են սպանվել և վիրավորվել: Բացի այդ, բախումներ են ընթանում Մարիյան, Մունտաֆ, Թել Քարիմա գյուղերում, որտեղ զինյալները լուրջ կորուստներ են կրել:
Մյուս կողմից, շարունակվում են բախումնրը Հալեպի թաղամասերում: Մասնավորապես, Հանանու, Ջանդուլ, Հանդարաթ, Ալ Լիրմուն թաղամասերում տասնյակ զինյալներ են սպանվել:
«Ալ Ջազիրա»-ն տեղեկացնում է, որ Համայի Քաֆրզիթա գյուղում վառվող նյութերով ռմբակոծության հետևանքով մեկ երեխա է զոհվել, տասնյակ մարդիկ վիրավորվել են: Ռմբակոծվել է նաև Համայի Ատշան գյուղի գաղթականների ճամբարը: Աղբյուրի տեղեկացմամբ` զինված ընդդիմադիրները հսկողության են հաստատել Հալեպի հյուսիսում գտնվող 3 գյուղերի վրա: Ընդդիմադիրները ռմբակոծել են Հալեպի Զահրա և Նաբլ գյուղերում կառավարական ուժերի հենակտերը: Բախումներ են ընթանում նաև Դամասկոսի Ջոբար թաղամասում և Զամալքա քաղաում, ինչպես նաև Մլիհե գյուղում:
Սիրիայում եռամյա հակամարտության ընթացքում, ՄԱԿ-ի տվյալներով, զոհերի թիվը գերազանցել է 150 հազարը: Բացի այդ, զոհված հայերի թիվը գերազանցել է 100-ը: