1 րոպեի ընթերցում
ԵՐԵՎԱՆ, 23 ՀՈւՆԻՍԻ, ԱՐՄԵՆՊՐԵՍ: Սիրիան հունիսի 23-ին հանձնել է իր երկրի տարածքում մնացած քիմիական նյութերը: Ինչպես հաղորդում է «Արմենպրես»-ը, վկայակոչելով «Ալ Մայադին» կայքը, քիմիակատները կշռել են 100 տոննա: Իր հերթին Քիմիական զենքի արգելման կազմակերպության ղեկավար Ահմադ Օզմունջոն հայտարարել է, որ Սիրիայից դուրս է բերվել քիմիական զենքի վերջին խմբաքանակը: Նա նաև ավելացրել է, որ Սիրիայից դուրսբերման ենթակա քիմիական նյութերը բեռնավորվել են օրվա երկրորդ կեսին դանիական նավ, և այն արդեն հեռացել է Լաթաքիայի նավահանգստից:
Ավելի վաղ կազմակերպությունը մտահոգված էր, որ մինչև հունիսի 30-ը հնարավոր է, որ քիմիական զենքերի 8 տոկոսը անհնարին լինի դուրս բերել Սիրիայից:
Սահմանված ժամկետի համաձայն՝ Սիրիայի քիմիական զենքերը երկրից պետք է դուրս բերվեին մինչև հունիսի 30-ը: Վերջին խմբաքանակը գտնվում էր բախումային շրջանում, ուստի, սիրիական իշխանություններին երկար ժամանակ չէր հաջողվում կազմակերպել դրանց դուրսբերումը: