1 րոպեի ընթերցում
ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: Արցախի Հանրապետության Նախագահ Բակո Սահակյանը մայիսի 22-ին շնորհավորական ուղերձ է հղել աշխարհահռչակ շանսոնյե Շառլ Ազնավուրին` ծննդյան 90-ամյակի կապակցությամբ: Ինչպես «Արմենպրես»-ին տեղեկացրին Արցախի Հանրապետության նախագահի աշխատակազմի տեղեկատվության գլխավոր վարչությունից, ուղերձում ասված է.
«Թանկագին Շառլ Ազնավուր,
Արցախի ժողովրդի, իշխանությունների եւ անձամբ իմ անունից ջերմորեն շնորհավորում եմ Ձեզ պանծալի հոբելյանի` ծննդյան 90-ամյակի կապակցությամբ:
Դուք կենդանի լեգենդ եք, ում կյանքը դարձավ հարազատ ժողովրդի ճակատագրի մարմնացումը: Ձեր ապրած տարիները, հայրենասիրությունն ու անձնվիրությունը լավագույն օրինակ են գալիք սերունդների համար:
Արցախցիները սիրում ու հպարտանում են Ձեզնով, ինչպես եւ ողջ հայ ժողովուրդը, ում արժանի զավակն եք հանդիսանում Դուք: Մենք բոլորս Ձեր անզուգական արվեստի հավատարիմ երկրպագուներն ենք:
Մեկ անգամ եւս շնորհավորում եմ Ձեզ եւ մաղթում ղարաբաղյան երկարակեցություն, քաջառողջություն ու ամենայն բարիք»: