Հայտնի է Շառլ Ազնավուրի համերգների ժամանակացույցը

ԵՐԵՎԱՆ, 12 ՄԱՅԻՍԻ, ԱՐՄԵՆՊՐԵՍ: Ֆրանսահայ լեգենդար երգիչ Շառլ Ազնավուրն ամբողջ 2014 թվականի ընթացքում կծավալի ստեղծագործական բուռն գործունեություն: Տարվա հենց սկզբից Ազնավուրն աշխարհի տարբեր ծայրերում ապրող իր երկրպագուներին տարատեսակ անակնկալներ էր մատուցում:

2014-ը լեգենդի համար հատկանշական է մի շարք պատճառներով: Առաջին հերթին` մայիսի 22-ին Ազնավուրը տոնում է իր ծննդյան 90-ամյա հոբելյանը: «Արմենպրես»-ի փոխանցմամբ` ինքը Ազնավուրն իր հոբելյանի առթիվ յուրահատուկ անակնկալ է մատուցել երկրպագուներին: Շառլ Ազնավուրի տարբեր տարիների գործերն ամփոփող 32 ձայնասկավառակից կազմված ձայնադարանը երկրպագուների համար հասանելի է ապրիլի 28-ից: Ձայնադարանում ներառված են Ազնավուրի`1948-2011 թվականերին ստեղծված անկրկնելի գործերը:

Բացի այդ, Ազնավուրը տարին սկսել է համերգների իսկական տարափով: Մարտի 15-ին լեգենդը ելույթ ունեցավ Թել Ավիվի «Նոկիա» համերգասրահում, այնուհետև անակնկալ մատուցեց Լոձ քաղաքի իր երկրպագուներին:

Ազնավուրի հաջորդ համերգը մայիսի 12-ին է` իր հայրենիքում: Լեգենդար երգիչը, ով արդեն ժամանալ է Երեւան, այսօր Կարեն Դեմիրճյանի անվան մարզահամերգային համալիրում աննկարագրելի րոպեներ կպարգևի հայ հանդիսատեսին: Այնուհետև Շառլ Ազնավուրն իր ծննդյան տոնը կնշի գերմանացի հանդիսատեսի հետ` մայիսի 22-ին «O2 World» համերգասրահում: Երկու օր անց լեգենդը կրկին բեմում կլինի, և այս անգամ Ֆրանկֆուրտի «Festhalle»-ից կրկին կգերի ունկնդիրներին: Հաջորդ կանգառը Լոնդոնն է և թագավորական «Ալբերտ» սրահը: Այնուհետև հունիսի 26-ին Ազնավուրին կսպասեն Բարսելոնայում: Սեպտեմբերին լեգենդը կմեկնի ԱՄՆ, ապա նոյեմբերի 11-ին կրկին կվերադառնա Եվրոպա. նա հանդես կգա Բելգիայի «Lotto Arena» սրահում:

Ազնավուրի հոբելյանի առթիվ ամբողջ աշխարհում կկազմակերպվեն տոնական միջոցառումներ: Տարբեր երաժիշտներ կշնորհավորեն լեգենդին` հոբելյանի կապակցությամբ:Ի դեպ, նման միջոցառումների մեկնարկը տրվել էր դեռևս տարեսկզբին: Մի քանի օրից` մայիսի 15-ին Փարիզում, «Անակո» զբոսանավի վրա կանցկացվի «Ջոանա Մենդիլը երգում է Ազնավուր» խորագրով հարգանքի տուրք-երեկո: Կայանալիք համերգին երգչուհի Ջոանա Մենդիլը կներկայացնի լեգենդի ստեղծագործությունները:

Այսքանով Ազնավուրին նվիրված միջոցառումները չեն սահմանափակվում: Մինչև տարեվերջ կլինեն բազում անակնկալներ` թե Ազնավուրի և թե նրա երկրպագուների կողմից:

Նշանավոր ֆրանսահայ շանսոնյե, երգիչ, երգահան, կինոդերասան և հասարակական գործիչ Շառլ Ազնավուրը ծնվել է 1924 թվականի մայիսի 22-ին Փարիզում: Բազմաթիվ հայտնի գործերի հեղինակ և կատարող է: Վաճառվել է Ազնավուրի ստեղծագործություններն ամփոփող շուրջ 100 միլիոն ձայնապնակ: 2009 թվականից Ազնավուրը Շվեյցարիայում Հայաստանի դեսպանն է, ինչպես նաև Ժնևի ՄԱԿ-ի գրասենյակում և այլ միջազգային կազմակերպություններում Հայաստանի մշտական ներկայացուցիչը:

Ռոզա Գրիգորյան