3 րոպեի ընթերցում
ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Շախմատի աշխարհի չեմպիոնի հավակնորդների մրցաշարի այս տարվա մասնակիցներից մասնագետներն առանձնացնում են Լևոն Արոնյանին: Սակայն մրցաշարի ընթացքի վրա իրենց ազդեցությունը կարող են թողել Վլադիմիր Կրամնիկը, Սերգեյ Կարյակինը: Հավակնորդների մրցաշարի մեկնարկից մեկ օր առաջ «Արմենպրես»-ը ներկայացնում է բացառիկ հարցազրույցը մրցաշարի մասնակից Սերգեյ Կարյակինի հետ:
-Ինչպիսի՞ սպասելիքներ ունեք հավակնորդների մրցաշարից:
-Բնականաբար, ցանկանում եմ հաղթել: Սակայն, վստահ եմ, որ ահեղ պայքար է լինելու, նույնիսկ ավելի հետաքրքրական` քան մեկ տարի առաջ Լոնդոնում էր: Թող ուժեղագույնը նվաճի Կարլսենի հետ մենամարտելու իրավունքը: Ես բոլոր ուժերս գործադրելու եմ, որ հնարավորություն ստանամ մրցելու Մագնուսի հետ: Սա, իհարկե, անհավական դժվար կլինի:
- Լևոն Արոնյանը Ձեր ուղղակի հակառակորդն է, ինչպիսի՞ մրցակից է նա:
-Մենք շատ լավ, ընկերական հարաբերությունների մեջ ենք: Ես շատ բան ունեմ Լևոնից սովորելու: Այս տարի մենք իրար հետ երկու պարտիա ենք խաղացել: Ես նրան հաղթեցի Նորվեգիայի մրցաշարում, իսկ նա ինձ գերազանցեց Վեյկ ան Զեեում: Իմ կարծիքով, Արոնյանը հսկայական ներուժ ունի: Նա զարմացնում է իր շախմատային հզորությամբ: Դրա հետ մեկտեղ նա մեծ ինտելեկտուալ է: Շատ ուրիշ այլ հետաքրքրություններ էլ ունի, ես գիտեմ, որ նա սիրում է բասկետբոլը, և երկրպագում է «Բոսթոն»-ին:
- Ձեր կարծիքով, ով է մրցաշարի գլխավոր հավակնորդը:
-Վերջին մրցաշարերում ցույց տված արդյունքներով, ես Հավակնորդների մրցաշարի գլխավոր ֆավորիտ Լևոն Արոնյանին եմ համարում: Բայց պակաս ուժեղ չէ նաև Վլադիմիր Կրամնիկը: Լավ մարզավիճակում է Սվիդլերը, կարող է «հարվածել» նաև Տոպալովը: Իսկ եթե ամեն ինչ դիտարկենք զուտ մաթեմատիկական հաշվարկների տեսանկյունից, ապա «թիվ մեկ» ֆավորիտը Լևոն Արոնյանն է:
-Ի՞նչ գիտեք հայկական շախմատի մասին:
-Հայկական շախմատի դպրոցը, իրավամբ, աշխարհի ուժեղագույն դպրոցներից է:«Բումը» սկսվեց, երբ Տիգրան Պետրոսյանը նվաճեց աշխարհի չեմպիոնի թագը: Սակայն հայ գրոսմայստերները միշտ էլ ուշադրության կենտրոնում են եղել: Ինչպես նաև Գարրի Կասպարովը, ով ևս մոր կողմից հայ է: Իսկ ահա շախմատային օլիմպիադաներում Հայաստանի թիմը ֆանտաստիկ խաղ է ցուցադրում: Լևոն Արոնյանի գլխավորությամբ այդ թիմն անցած 4 օլիմպիադաներից երեքում հաղթող է դարձել: Հայաստանում շախմատն ազգային մարզաձև է: Իսկ Արոնյանը մեկ անգամ չէ, որ լավագույնն է ճանաչվել մարզիկների մեջ, այլ նաև համարվել է Տարվա մարդ: Այս փաստը, ինքնին, խոսում է նրա մասին:
Հարցազրույցը` Վարվառա Հայրապետյանի