ՄԱԿ-ի գլխավոր քարտուղարը սիրիական ճգնաժամի լուծման միակ ուղին տեսնում է «Ժնև 2»-ի բանակցություններում
1 րոպեի ընթերցում
ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: Սիրիական ճգնաժամի լուծման համար «Ժնև 2»-ից բացի այլ տարբերակ գոյություն չունի, և անհրաժեշտ է շարունակել համաժողովը: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, այս մասին փետրվարի 20-ին հայտարարել է ՄԱԿ-ի գլխավոր քարտուղար Պան Կի Մունը՝ ավելացնելով. «Չնայած բանակցությունների երկու փուլերը լավ առաջընթաց չեն գրանցել, այնուամենայնիվ, այլ ճանապարհ չկա, բացի «Ժնև 2» համաժողովը շարունակելը»:
Պան Կի Մունը նշել է, որ մշտապես կապի մեջ է ՄԱԿ-ի և ԱԵԼ-ի հատուկ բանագնաց Ախդար Իբրահիմիի հետ, ով մոտ ժամանակներս պետք է մեկնի Նյու Յորք՝ ներկայացնելու բանակցությունների երկու փուլերի արդյունքների վերաբերյալ զեկույց:
Միջսիրիական բանակցությունների երկրորդ փուլը շատ երկրների, այդ թվում ԱՄՆ-ի, Ֆրանսիայի, Մեծ Բրիտանիայի կարծիքով` ձախողվել է, և ձախողման մեջ նրանք մեղադրել են Դամասկոսին: Դրան զուգահեռ, սիրիական կառավարական պատվիրակության ղեկավար Ուալիդ ալ Մուալլեմը հայտարարել էր, որ բանացկությունները չեն ձախողվել և գլխավոր համաձայնությունը եղել է այն, որ բանակցությունների հաջորդ փուլում առաջնային կքննարկվի Սիրիայում ահաբեկչության դեմ պայքարի հարցը: