Սիրիայի ընդդիմադիր կոալիցիայի ղեկավարը կհանդիպի Լավրովի հետ

ԵՐԵՎԱՆ, 3 ՓԵՏՐՎԱՐԻ, ԱՐՄԵՆՊՐԵՍ: Սիրիայի ընդդիմադիր և հեղափոխական ուժերի ազգային կոալիցիայի պատվիրակությունն, Ահմադ ալ Ջարբայի գլխավորությամբ, փետրվարի 3-ին կմեկնի Մոսկվա: Ինչպես հաղորդում է «Արմենպրես»-ը, վկայակոչելով ռուսական լրատվամիջոցները, փետրվարի 4-ին նախատեսված է պատվիրակության հանդիպումը Ռուսաստանի արտաքին գործերի նախարար Սերգեյ Լավրովի հետ: Ռուսաստանի արտգործնախարարությունից տեղեկացրել են, որ հանդիպումը պլանավորվել է Սիրիայի ճգնաժամի խաղաղ կարգավորման շրջանակներում:

Կոալիցիայի անդամ Լուայ Սաֆին նշել է, որ Ահմադ Ջարբան Լավրովի հետ հանդիպման ժամանակ կքննարկի հակամարտության քաղաքական լուծման հարցը:

Ռուսաստանի և ԱՄՆ-ի նախաձեռնությամբ հունվարի 22-ին մեկնարկած` Սիրիայի վերաբերյալ միջազգային համաժողովը, որին մասնակցում էին Սիրիայի կառավարական և ընդդիմադիր պատվիրակությունները, մեծ արդյունքներ չտվեց: Ակնկալվում է, որ միջսիրիական բանակցությունների 2-րդ փուլը, որը կմեկնարկի փետրվարի 10-ին, կլինի կառուցողական: